Yakkabog‘da koronavirusdan davolanayotgan bemorlardan kislorod ballonlari uchun pul yig‘ilayotgani aytildi.

Ijtimoiy tarmoqlarda Qashqadaryo viloyati Yakkabog‘ tumani yuqumli kasalliklar shifoxonasida koronavirusdan davolanayotgan bemorlarga kislorod ballonlari yetishmayotgani haqida xabarlar tarqaldi. Unda bemorlardan ularni kislorod ballonlari bilan ta'minlash uchun pul yig‘ilayotgani ham aytilgan. Tuman hokimligi axborot xizmati holatga izoh berdi.

Ma'lum qilinishicha, ushbu xabar yuzasidan tegishli tashkilot rahbarlari bilan yuqumli kasalliklar shifoxonasida o‘rganish olib borilgan.

O‘rganish davomida, bemorlarga kislorod ballonlari yetishmayotgani hamda kislorod ballonlari bilan ta'minlash uchun ulardan pul yig‘ilayotgani to‘g‘risidagi gaplar o‘z isbotini topmagan.

Tuman tibbiyot birlashmasi rahbari Sarvar Jo‘rayevning ma'lum qilishicha, Yakkabog‘ tumani yuqumli kasalliklar shifoxonasida jami 45 dona kislorod balonlari bor. Ularni har kuni to‘ldirib kelishda hech qanday muammo bo‘lmagan.