JSST Afg‘onistonga yordam yetkazish uchun zudlik bilan havo yo‘lagi ta'minlanishini talab qildi 

JSSTda ta'kidlanishicha, Afg‘onistonga joriy haftada yetkazilishi kerak bo‘lgan 500 tonna dori-darmon, jumladan, jarrohlik qurilmalari va to‘yib ovqat yemaslik asoratlarini davolash uchun to‘plamlar Kobul aeroportidagi cheklovlar sababli yetkazilmay qolib ketmoqda. Boshqa insonparvarlik tashkilotlari ham shunday muammolarni his qilmoqda. 

JSST Afg‘onistonga muntazam ravishda va hech qanday to‘siqlarsiz yordam yetkazish imkonini beradigan havo yo‘lagi ajratilishini talab qilmoqda.

Tashkilotning favqulodda vaziyatlar bo‘yicha mintaqaviy direktori Richard Brennanning aytishicha, Afg‘onistonning deyarli yarim aholisi – 18,5 mln kishi insonparvarlik yordamiga ko‘z tikib turibdi va ularning ehtiyojlari qurg‘oqchilik sababli yanada ko‘payadi. Biroq Kobul aeroportining yopilishi yordam yetkazilishini ortga surmoqda.

“Butun dunyodagi nigohlar Afg‘onistondan evakuatsiya qilinayotgan odamlar va uchib ketayotgan samolyotlarga qadalgan bir paytda biz ortda qolganlarga yordam berish uchun zaxiralarni yetkazishimiz kerak”, deb aytgan Brennan.

Ta'kidlanishicha, JSSTning toliblar hokimiyatni egallagan ilk kunlardagi ustuvor vazifasi xodimlari xavfsizligini ta'minlash bo‘lgan, biroq hozirda tashkilot butun e'tiborini Afg‘onistonda qolayotgan millionlab odamlarga yordam berishga to‘liq qaratgan.