18:31 / 04.09.2021
10225
Фермердан фақат ғалла ва пахта сўраларди. Бундан икки томон ҳам ютқазиб келган

Юртимизда фермерлик ҳаракати бошланган дастлабки йилларданоқ ўз фермер хўжалигимни ташкил қилдим. Ўша йилларда битта йўналишда фаолият олиб борган бўлсам, бугунги кунда еттита йўналишда меҳнат қиляпмиз. Яъни кўп тармоқли фермер хўжалигига айландик.

Очиғи, тизим сўнгги йилларда анча ислоҳ қилинди. Хусусан, аввал биздан фақат пахта ва ғалла сўраларди. Йўқ, бундан фермер ҳам, давлат ҳам ютқазади. Ҳозирги вақтда боғдорчилик, яъни интенсив боғ ташкил қилдик. Шундан 10 гектарида олма, қолган 5 гектарида узум парваришлаяпмиз. Бундан ташқари, қорамолчилик, паррандачилик ва балиқчилик соҳаларини ривожлантириш орқали миллионлаб даромад кўраман. Ҳозирги кунда балиқхонамизда 12 минг дона балиқ боқиляпти.

Куни кеча ижтимоий тармоқларда косаси оқармаган ўзбек фермери мазмунида мақола эълон қилинди. Қизиқ, аввал келинг, фермерлар билан суҳбатлашинг, шароити, муаммо ва камчилигини ичдан ўрганинг. Аниқ айта оламан, ернинг тилини билмаган, соҳани тушунмаган одам ўттиз йил эмас, эллик йилда ҳам аравани тортолмайди. Аммо ҳақиқий фермер қўша-қўша машина оляпти, тўй қиляпти, керак бўлса, бошқа соҳаларнинг ҳам ривожланишига ҳисса қўшяпти. Боғча ва сервис хизматларини йўлга қўйган фермерларимиз кўп. Ўнлаб, юзлаб маҳалладошларнинг оғирини енгил қилаётган, бандлигини таъминлаётганлар бор.

Ушбу ишларнинг барчасини фермер, яъни мулкдор бўлиб, ердан даромад олиб қиляпмиз. Қўшимча тармоқлар очиб, қишлоққа саноат олиб киряпмиз.

2019 йилда Қозоғистон давлатига 1 150 000 долларлик мева-сабзавот экспорт қилдик. Германия давлатидан наслли қорамоллар олиб келдик. Ҳозирги кунда фермер хўжалигимизда кунига 500 литргача сут оляпмиз. Шу йил ҳисобидан 300 000 000 млн сўм соф даромад олишни мўлжаллаб турибмиз.

Бу йил 50 тоннадан ортиқ етиштирган ғаллам ўз ихтиёримда қолди. Мен уни бозор нархларида сотдим. Бу ҳам биз, фермерларга берилган субсидия, десам адашмайман.

Гапнинг индаллосини айтай, дангаса одамга ер вафо қилмайди. Ҳисоб-китобини йўқотган, банк айланмасини тушунмайдиган, эскича ишлайман, деган фермер албатта нолийди. Чунки унинг иши юришмайди. Шунчаки ерни олиб қўйган, куним ўтса қабилида ишлайди. Вақт бундайларни ҳам кўрсатяпти. Ер ҳақиқий эгасига қайтариляпти. Аслида ҳам шундай бўлиши керак.

Аҳрор Бозаров,
Қарши туманидаги “Худойқулов Сарварбек Аҳрорович”
фермер хўжалиги раҳбари.

***  

  Чекка бир туманнинг фермери нишон олишини кутмагандим


Мустақилликнинг дастлабки йиллариданоқ кўп тармоқли фермер хўжалиги сифатида қишлоқ хўжалиги маҳсулотини етиштириш билан бирга, уни қайта ишлаш, сақлаш ва реализация қилиш, хизматлар кўрсатишни мақсад қилганмиз.

Бугунги кунда фермер хўжалигим пахта-ғаллачилик, сабзавотчилик, чорвачилик, иссиқхона ва бошқа йўналишларда фаолият кўрсатмоқда.

Биз, фермерлар учун яратилган имкониятдан фойдаланиб, хўжалигим ҳисобидаги зарур техникаларни имтиёзли кредит асосида харид қилдим ва ушбу техникалардан ҳосил унумдорлиги учун фойдаланяпман. Бундан ташқари, қорамолчилик, паррандачилик ва сабзавотчилик соҳаларини ривожлантириш орқали йилига миллионлаб даромад кўраман.

2021 йилги ғалла ҳосилидан 42,5 гектар ғалла экиб, 150 миллион сўм, чорвачилик соҳасида 5 та от, 42 та қорамол, 120 та қўй мавжуд бўлиб, мазкур соҳадан йилига ўртача 150-160 миллион сўм даромад кўряпман. Боғдорчилик йўналишида 5 гектар ерга олма кўчати экилган бўлиб, олмадан ўртача 40 миллион сўм соф даромад қилдим.

Келгусида хўжалигимизнинг ҳар бир тармоғини ривожлантириш орқали даромадимизни ошириш имконияти катта. Бу бизнинг қўлимизни узун қилади. Масалан, олинган ялпи ҳосилнинг бир қисмини чет элга экспорт қилишни режалаштиряпмиз. Кутилаётган юқори даромад эвазига ижтимоий соҳанинг ривожига ўз ҳиссамизни қўшиш, жумладан, хусусий мактабгача таълим муассасаси, тикув цехлари қуриб, қишлоқ аҳолисини иш билан таъминлаш кўзда тутилган.

Куни кеча ижтимоий тармоқларда косаси оқармаган ўзбек фермери мазмунида мақола эълон қилинибди, мен бир оддий фермерга давлатимиз томонидан имтиёзлар ва субсиялар берилмаганида юқоридаги санаб ўтилган ютуқларимдан биронтасини амалга оширолмаган бўлар эдим. Ҳар хил гапларга учмасдан бизга берилган имкониятлардан фойдаланиб, ўз ишимизни қилганимиз дуруст деб айтаман деҳқонларимизга. Давлатимизга мингдан минг раҳмат айтсак арзийди.

Яқинда “Ўзбекистон Республикаси мустақиллигининг 30 йиллиги” кўкрак нишони билан тақдирландим. Бу эътироф ҳам мен учун катта ишонч ва масъулият берди.

 

Сирожиддин Бердиев,
Яккабоғ туманидаги “СУРҚАШ” фермер хўжалиги раҳбари Ⓣ

Top