Nargiza Parpiyeva: “Tuberkulyoz davosiz kasallik emas, to‘g‘ri davolansa bemor butunlay sog‘ayadi”

Toshkentda Markaziy Osiyoda tuberkulyozni  integratsiyalashgan nazorat qilish bo‘yicha 5-xalqaro konferensiya bo‘lib o‘tmoqda. Tadbir Sog‘liqni saqlash vazirligi va Respublika ixtisoslashtirilgan ftiziatriya va pulmonologiya ilmiy-amaliy tibbiyot markazi tomonidan, AQSh xalqaro taraqqiyot agentligi, Jahon sog‘liqni saqlash tashkilotining (JSST) O‘zbekistondagi vakolatxonasi texnik ko‘magi va Germaniya KFW taraqqiyot banki moliyaviy yordamida tashkil etildi.

O‘zbekistonda Tuberkulyozga qarshi tadbirlarni amalga oshirish JSST tomonidan tavsiya etilgan “Tuberkulyozga barham berish” strategiyasiga muvofiq amalga oshirilyapti. Ushbu strategiyani amalga oshirish natijasida tuberkulyozga chalingan bemorlar standart diagnostika va klinik xizmatlardan foydalanish imkoniyatiga ega bo‘lib, xalqaro standartlarga javob beradigan davo olmoqdalar.

SSV bosh ftiziatri, ftiziatriya va pulmonologiya markazi rahbari, professor Nargiza Parpiyeva Kun.uz muxbiri bilan suhbatda quyidagilarni aytdi:

“Avvalo bir narsani ta'kidlamoqchiman – tuberkulyoz davosiz kasallik emas, to‘g‘ri davolansa bemor albatta butunlay sog‘ayadi. Shuningdek, bu kasallikni davolash bilan bog‘liq barcha dori-darmonlar davlat tomonidan bepul ta'minlanishi kafolatlangan. O‘zbekiston so‘nggi yillarda tuberkulyozni tashxislash va davolashda katta tajriba to‘pladi, ma'lum muvaffaqiyatlarga erishdi. Oldin bu kasallikni yakuniy tashxislash uchun 3 oy vaqt sarflagan bo‘lsak, hozir 70 daqiqa kifoya. Bu yutuq kasallikni erta aniqlash, tezkor va samarali davolashda juda muhim. Shuningdek, butun dunyo bo‘ylab tuberkulyozni davolash davomiyligi o‘rtacha 24 oyni tashkil qilsa, O‘zbekiston tajribasi orqali bu muddatni avval 9 oyga tushirdik. Hozirgi kunda esa 6 oyda to‘liq davolash bo‘yicha dastlabki natijalarni tahlil qilyapmiz. Muddatni qisqartirish juda muhim, sababi – bu kasallikning psixologik jihatlari ham bor. Uzoq vaqt davolanish bemor va yaqinlarining ruhiyatiga salbiy ta'sir qiladi”.

Shuningdek, professor xalq orasida “sil kasalligi” deb nomlanuvchi bu kasallikning rasmiy va to‘g‘ri nomi “tuberkulyoz kasalligi” ekanligi ham bildirib o‘tdi.