AQSh samolyotiga osilib halok bo‘lgan afg‘on futbolchisining oilasi uning o‘limida amerikalik harbiylarni aybladi

Anvariy evakuatsiya vaqtida mamlakatdan qochishga uringanida halok bo‘lgan. Sportchi AQShning harbiy-transport samolyoti C-17A shassisiga osilgan kuyi mamlakatni tark etishga uringanlar orasida bo‘lgan. Keyinroq uning tanasi bo‘laklari shassi bo‘linmasidan topilgan.

Zakariyoning aytishicha, uning oilasi ukasining xorijga qochishiga qarshi bo‘lgan, biroq u telefon orqali deyarli samolyotga chiqa olganini aytgan. 15 daqiqadan keyin esa uning telefonidan noma'lum shaxs qo‘ng‘iroq qilib, sportchining o‘lganini ma'lum qilgan.

Shundan keyin Anvariyning yaqinlari Kobul aeroportiga kelishgan, biroq uning jasadini 2 kundan keyin topa olishgan. Futbolchining oilasi bunda amerikalik harbiylarni ayblamoqda. Zakariyoning ta'kidlashicha, harbiylar odamlarni samolyotlar yoniga qo‘ymasligi kerak edi.

U Afg‘oniston hukumati va xalqaro hamjamiyatdan ukasi va boshqa afg‘onlarning aeroportda halok bo‘lishini tergov qilishni talab qilgan.

16 avgustda Kobul aeroportidagi talato‘plar chog‘ida bir qancha afg‘onistonliklar aeroportdan uchayotgan AQSh harbiy samolyotiga tashqi tomondan chirmashgan holda mamlakatni tark etishga uringan. Biroq ular yuqori tezlikda uchuvchi samolyotning shassisi va korpusini uzoq vaqt davomida ushlab tura olishmagan va natijada katta balandlikdan yerga qulab halok bo‘lishgan.