Tanzila Norboyeva: «Qashqadaryo viloyatining qator hududlarida deputatlar ruxsatisiz 10 mlrd so‘mga yaqin mablag‘ ishlatib yuborilgan»

Qayd etilishicha, mahalliy budjetlarda shakllangan qo‘shimcha manbalardan foydalanishda qator kamchiliklarga yo‘l qo‘yilmoqda.

“Ushbu mablag‘larni ishlatishda mahalliy kengashlar hal qiluvchi vazifani bajaradi. Biroq ular bunga talab darajasida qaramayapti. Birgina Qashqadaryo viloyatining G‘uzor, Mirishkor, Kasbi, Chiroqchi tumanlari va Qarshi shahrida mahalliy kengashlarda muhokama qilinmasdan, deputatlarning ruxsatisiz 10 mlrd so‘mga yaqin mablag‘ ishlatib yuborilgan”, dedi Senat raisi. 

Bildirilishicha, mahalliy kengashlar vakillari, budjet bo‘yicha doimiy komissiya a'zolari, kotibiyatlar bu borada mas'uliyatni oshirishlari lozim.

“Umuman, bunday holatlarni boshqa hududlar misolida ham keltirish mumkin. Mahalliy Kengashlar qonun bilan o‘zlariga berilgan vakolatlarni chuqur anglab, amalda samarali foydalangan holda talabchanlikni oshirmas ekanlar bu kabi muammolar kamaymaydi. Shu jihatdan, mahalliy Kengashlar vakillari, ayniqsa, budjet bo‘yicha doimiy komissiya a'zolari, shu jumladan, kotibiyatlar bu borada mas'uliyatni oshirishlari lozim”, dedi Tanzila Norboyeva.