Afg‘oniston Islom Amirligi hukumati rahbarining o‘rinbosari O‘zbekistonga keldi

Bugun, 16 oktabr kuni Afg‘oniston muvaqqat hukumati rahbarining o‘rinbosari vazifasini bajaruvchi, etnik o‘zbek Abdul Salam Hanafiy boshchiligidagi delegatsiya Termiz shahriga tashrif buyurdi.

Hanafiy bungacha "Tolibon"ning Dohadagi siyosiy qanoti rahbari o‘rinbosari sifatida G‘arb bilan muzokaralarda faol qatnashgan / Foto: AP

Tashrif O‘zbekiston tashqi ishlar vaziri Abdulaziz Komilovning 2021 yil 7 oktyabrda Afg‘onistonga amaliy tashrifi chog‘ida erishilgan kelishuvlarni amalga oshirishga bag‘ishlanadi. Bu haqda TIV rasmiy vakili Yusufbek Qobuljonov xabar berdi.

Muzokaralarda O‘zbekiston tomoniga bosh vazir o‘rinbosari – investitsiyalar va tashqi savdo vaziri Sardor Umrzoqov boshchilik qiladi.

Foto: Afg‘oniston milliy televideniyesi (RTA)

Avgust oyida Afg‘oniston Islom Respublikasi qulab, mamlakat “Tolibon” nazoratiga o‘tdi.

7 oktabr kuni O‘zbekiston tashqi ishlar vaziri Abdulaziz Komilov boshchiligidagi delegatsiya Kobulga borib, Afg‘oniston Islom Amirligi tashqi ishlar vaziri v.b. Mavlaviy Amir Xon Muttaqiy bilan uchrashuv o‘tkazgan edi.