Shavkat Mirziyoyev Pskentda yashayotgan oilani bag‘rikenglik namunasi sifatida tilga oldi

“Hammamiz yaxshi bilamiz, Toshkent viloyati o‘zining so‘lim tabiati, ko‘hna va boy tarixi, iqtisodiy, madaniy-ma’naviy salohiyati bilan mamlakatimiz taraqqiyotida alohida o‘rin tutadi.

Viloyatning oltin, kumush, mis, marmar, ko‘mir, qo‘rg‘oshin, alyuminiy kabi o‘nlab qimmatbaho va noyob qazilmalarga boy konlari, energetika, mashinasozlik, kon-metallurgiya, kimyo, oziq-ovqat, qurilish materiallari, to‘qimachilik tarmoqlaridagi yirik korxonalari sanoatimiz rivoji uchun muhim ahamiyat kasb etadi. 

Bu diyorning eng asosiy boyligi – aslida, uning mehnatkash, bag‘rikeng, ko‘pmillatli xalqidir. Viloyatda yuzdan ortiq millat va elat vakillari ahillikda yashab, bahamjihat mehnat qilmoqdalar. 

Shu borada, e’tiborga loyiq bir hayotiy misolni keltirmoqchiman. Piskent tumanining “Oqtepa” mahallasida istiqomat qiladigan Jonsaidovlar oilasi haqida eshitgan bo‘lsangiz kerak. Tojik ota, qozoq onaning yetti nafar kelini – o‘zbek, qozoq, rus, uyg‘ur, gruzin, chechen millatlariga mansub bo‘lib, ular ahil hayot kechirmoqda. Mana sizga bag‘rikenglik namunasi, mana sizga totuvlikning yorqin ifodasi”, dedi prezidentlikka nomzod.