12:23 / 29.10.2021
12071
Дам олиш кунлари қандай об-ҳаво кузатилиши маълум қилинди

Бугун кундуз куни Ўзбекистон ҳудудининг катта қисмида булутли ва ёғингарчиликсиз совуқ об-ҳаво бўлиши кутилмоқда. Фақат Фарғона водийсида куннинг иккинчи ярмида бироз ёмғир ёғади, Тошкент вилоятида куннинг биринчи ярмида баъзи жойларда бироз ёмғир ёғиши мумкин. 

Фото: Kun.uz

«Ўзгидромет» хабарига кўра, тоғли ҳудудларда баъзи жойларда ёмғир ва қор кўринишидаги ёғингарчилик кузатилади. Ҳаво ҳарорати 8-13 даража илиқ атрофида бўлади. Бу октябр ойи охирги кунлари меъёридан 4-5 даражага пастдир.

Эртага Ўзбекистонда булутлилик нисбатан кам бўлади, ёғингарчилик ҳатто тоғли ҳудудларда кутилмайди. Кечаси совуқ бўлади, кечаси ва эрталаб ҳарорат 0-3 даража илиққача пасаяди, кундуз куни эса қуёш ҳавони 16-19 даража илиққача иситади.

Якшанба куни республика бўйича ҳавода яна булут кўпайиши кутилмоқда, Ўзбекистоннинг айрим ҳудудларида бироз ёмғир ёғиши эҳтимоли бор, тоғларда баъзи жойларда ёғингарчилик (ёмғир, қор) бўлади. Ҳаво ҳарорати кечаси 2-7 даража илиқ, кундузи 12-17 даража илиқ атрофида бўлади.

Top