Xorazm viloyati Ekologiya va atrof-muhitni muhofaza qilish boshqarmasi Bog‘ot tuman inspeksiyasi davlat inspektorlari tomonidan o‘tkazilgan ekologik reyd tadbirida daraxtlarni noqonuniy kesib tashlash holati aniqlangan.
Jumladan, «Dehqonobod» mahallasida yashovchi fuqaro M.X. tegishli tashkilotlardan ruxsat olmasdan, o‘zboshimchalik bilan turli yoshdagi 8 tup gujum daraxtini noqonuniy ravishda kesib olgan.
Holat yuzasidan unga nisbatan Ma'muriy javobgarlik to‘g‘risidagi kodeksning 79-moddasi 1-qismi bilan ma'muriy bayonnoma rasmiylashtirilib, bazaviy hisoblash miqdorining 5 barobari, ya'ni 1,35 mln so‘m miqdorida jarima va tabiatga yetkazilgan 39,9 mln so‘m zarar hisoblangan.
Avvalroq, Ekologiya va atrof-muhitni muhofaza qilish boshqarmasi inspektorlari tomonidan Xorazm viloyatida aniqlangan huquqbuzarlik holatlari 2020 yilning mos davriga nisbatan 70 foizga oshgani haqida xabar berilgan edi.