Eronlik mansabdor shaxs mamlakatdagi yonilg‘i inqirozida AQSh va Isroilni aybladi

Eronning fuqaro mudofaasi tashkiloti rahbari, mamlakatning kiberxavfsizlik sohasiga mas'ul G‘ulomrizo Jaliliy joriy haftada Eronda yuz bergan yonilg‘i inqirozida AQSh va Isroilni aybladi. Inqiroz yonilg‘i ta'minoti tizimiga kiberhujum oqibatida yuz bergan.

Foto: alamy.com

Shu bilan birga, u tergov hali yakunlanmaganini qo‘shimcha qilgan.

“Biz sud ekspertizasi tomondan hali buni aniq ayta olmaymiz. Biroq tahlillarning ko‘rsatishicha, bu hujum sionistik rejim, amerikaliklar va ularning josuslari tomondan amalga oshirilgan”, deb aytgan Jaliliy davlat televideniyesiga bergan intervyuda.

Kiberhujum oqibatda Eronning turli qismlaridagi AYoQShlarda muammolar vujudga kelgan. Ta'kidlanishicha, hujumdan maqsad yonilg‘i bo‘yicha subsidiyalar beruvchi hukumat tarmoqlarini izdan chiqarish bo‘lgan.

Eron prezidenti Ibrohim Raisiy hujum mamlakatda tartibsizliklar uyushtirishga qaratilganini aytgan.

Ushbu kiberhujum Eronda 2019 yil noyabrda yuz bergan norozilik namoyishlarining 2 yilligi arafasida sodir etilgan. O‘shanda yonilg‘i narxining oshishi noroziliklarga va politsiya bilan to‘qnashuvlarga olib kelgan. OAVning ma'lum qilishicha, o‘sha namoyishlarni bostirish vaqtida yuzlab odamlar o‘ldirilgan.