Zelenskiy oligarxlarning siyosatga ta'sirini cheklovchi qonunni imzoladi

Ukraina prezidenti Vladimir Zelenskiy “Oligarxlar haqidagi qonun” deb atalayotgan qonunni imzoladi. Unga ko‘ra, Ukrainada kun ko‘rish uchun zarur bo‘lgan eng kam pulning 1 million miqdoridan ko‘proq (2,19 mlrd griven yoki 84 mln dollar) boylikka ega bo‘lgan fuqarolarning mamlakat siyosiy hayotiga ta'siri cheklanadi.

“Oligarxlarga qarshi qonunni imzoladim. Ushbu hujjat yirik biznes va siyosatchilar o‘rtasidagi munosabatlarni tubdan o‘zgartiradi. Endilikda barcha iqtisodiy o‘yinchilar qonun oldida barobar bo‘ladi va o‘ziga siyosiy imtiyozlarni sotib ololmaydi. Qonunning sindirilishiga yo‘l qo‘ymaymiz!” deb yozgan Zelenskiy. 

Uning ta'kidlashicha, Yevropaning barcha muvaffaqiyatli davlatlarida oligarxlar deb nomlanuvchi hokimiyat bo‘g‘ini yo‘q. “Ushbu davlatlarda hokimiyat bir guruh boyvachchalar uchun emas, balki o‘z fuqarolari manfaatlari uchun ishlaydi. 2019 yilgi saylovlarda fuqarolarimiz Ukrainada aynan shunday o‘zgarishlar yuz berishi uchun ovoz berishgandi”, deb qo‘shimcha qilgan Ukraina yetakchisi. 

Ta'kidlanishicha, ushbu qonun yirik biznesni siyosiy kurashdan ajratish va mamlakat iqtisodiy hayotiga oligarxlarning salbiy ta'sirini cheklashni ta'minlaydi. 

Ushbu qonun bilan oligarx deb kimni qabul qilish uchun mezonlar o‘rnatiladi. Jumladan, oligarx deb bir vaqtda kamida ushbu uchta mezonga javob beruvchi jismoniy shaxslarga aytiladi: siyosiy hayotda ishtirok etadi, OAVga katta ta'sir ko‘rsatadi, bozorda monopol holatni egallovchi sub'yektning egasi va kamida bir yil davomida ushbu holatni qo‘llab-quvvatlab kelgan shaxs.

Zelenskiy oligarxlarga qarshi kurash boshlanishi haqida mart oyida e'lon qilgan. O‘shanda u davlat zaxiralari, tabiiy boyliklari, strategik korxonalar va konstitutsiyaviy sudning noqonuniy o‘zlashtirilishi sababli “adolat tiklanishini” aytgan.