Yashnobod tumanida tabiiy gazdan 311 mln so‘mlik noqonuniy foydalanish holati aniqlandi

Toshkent shahrining Yashnobod tumanida xususiy uy-joy mulkdorlari shirkati tomonidan 311,1 million so‘mlik tabiiy gazdan noqonuniy foydalanish holati aniqlandi. Bu haqda Iqtisodiy jinoyatlarga qarshi kurashish departamenti ma'lum qildi.

Bosh prokuratura huzuridagi departamentning Yashnobod tumani bo‘limi tomonidan o‘tkazilgan tergovga qadar tekshiruvda, «P.K.» xususiy uy-joy mulkdorlari shirkati tomonidan gazlashtirish uchun zarur hujjatlarni rasmiylashtirmasdan tuman hududidagi ko‘p qavatli uyning qozonxonasiga 4 dona isitish uskunalarini o‘rnatib, noqonuniy ravishda gazdan foydalanilganligi oqibatida hududiy gaz ta'minoti korxonasi manfaatiga 311,1 mln so‘m zarar yetkazilganligi aniqlangan.

Mazkur holat yuzasidan Jinoyat kodeksining 185-2-moddasi (elektr, issiqlik energiyasi, gaz, vodoprovoddan foydalanish qoidalarini buzish) bilan jinoyat ishi qo‘zg‘atilib, tergov harakatlari o‘tkazilmoqda.