Samarqanddagi ko‘pkarida «Kamaz» pastlikka harakatlanib ketib «ZIL» bilan to‘qnashdi

Samarqand viloyati Payariq tumanida o‘tkazilgan ko‘pkari vaqtida «Kamaz» pastlikka harakatlanib ketgan. Oqibatda «ZIL» mashinasi bilan to‘qnashib, uni ag‘darib yuborgan.

Samarqand viloyati IIB axborot xizmatining xabar berishicha 2021 yil 14 noyabr kuni 16:00 larda Payariq tumani Polvonariq mahallasi hududida o‘tkazilgan uloq-ko‘pkari paytida «Kamaz» va «ZIL» yuk mashinalari to‘qnashib ketgan.

«Kamaz» haydovchisi mashinani ko‘pkari bo‘lib o‘tayotgan joy atrofidagi balandlikka qo‘ygan va e'tiborsizlik qilib uning qo‘l tormozini tortmagan. Oqibatda mashina pastlikka harakatlangan va «ZIL»ga urilib, uni ag‘darib yuborgan.

Mazkur hodisada hech kim jarohat olmagan. Faqat har ikkala yuk mashina jiddiy shikastlangan.

Qayd etilishicha, holat yuzasidan YHXB xodimlari tomonidan surishtiruv ishlari olib borilmoqda.