Autsayder maydonida parijliklar maksimal hujumkor tarkib tushirdi - Neymar, Mbappe va Di Mariya uchligini orqaroqdan, «o‘nlik» pozitsiyasidagi Messi qo‘llab turdi. Ammo bu oldindan kutilgan tarkib edi, kunning asosiy voqeasi esa Serxio Ramosning debyuti bo‘ldi. Uzoq vaqt davolangan ispaniyalik nihoyat «PSJ» safidagi ilk o‘yinini o‘tkazdi, bu uning olti oy va 23 kun davom etgan tanaffusdan keyingi ilk rasmiy o‘yini bo‘ldi.
O‘yin kutilganidek boshlandi — mehmonlar ketma-ket hujumlar uyushtirishdi, Mbappe birga-bir vaziyatdan foydalana olmadi, Neymarning goli ofsayd tufayli bekor qilindi. Ammo yashillar ilk bor katta kuch bilan oldinga tashlanganida Buanga Donnarummadan qaytgan to‘pni darvozaga joyladi. Lekin «Joffrua-Gishar»dagi muxlislar bayramni faqat videotakror orqali «o‘yindan tashqari holat» bekor qilinganidan keyin nishonlashdi. Parijliklar o‘z imkoniyatlarini yo‘qqa chiqarishda davom etishdi - darvozabon Grin ularning barcha urinishlarini bartaraf etaverdi.
Ammo birinchi bo‘lim yakunida arbitr Kolodjyeychakni maydondan chetlatdi, Messi esa jarima nuqtasidan to‘pni Markinosning boshiga qo‘ndirib berdi. Leo o‘zi gol urmadi, ikkinchi bo‘lim o‘rtalarida ideal pozitsiyadan xato zarba berdi, ammo kechaning asosiy yulduzi aynan u bo‘ldi. Argentinalik futbolchining navbatdagi uzatmasini Di Mariya golga aylantirdi.
Faqat Messining Markinosga navbatdagi golli uzatmasi Neymarning jarohati soyasida qolib ketdi. Braziliyalik hujumchi raqibning podkatidan qochmoqchi bo‘lganida oyog‘ini qayirib oldi. U og‘riqdan baqirib yubordi, shuning o‘ziyoq vaziyat naqadar jiddiyligini ko‘rsatardi. Maydonga chiqib kelgan shifokorlar bir necha daqiqa unga tibbiy yordam ko‘rsatishdi, keyin zambilga solgan holda maydondan olib chiqib ketishdi.
Aniq tashxis hali ma'lum emas, ammo Instagram sahifasida braziliyalik futbolchi qo‘ltiqoyoqqa suyangan holdagi rasmini qo‘yib, shunday yozdi: «Afsuski, bunday omadsizlik —sportchi hayotining bir qismi. Boshni tik ko‘targan holda qolamiz va oldinga yuramiz. Men yanada kuchliroq bo‘lib qaytaman».
So‘nggi ma'lumotlarga ko‘ra, uning tiklanishi uchun kamida olti hafta vaqt talab etiladi.
Buyuk Britaniyada qor bo‘ronlari davom etmoqda. Ammo, masalan, Shotlandiyada bu muammoga aylanmadi va «Reyndjyers» Livingstonda nisbatan yaxshi holatdagi gazonda o‘ynadi. Qorni kurab tashlashdi va maydon atrofida katta bo‘lmagan qor uyumlari paydo bo‘ldi.
Lankashirda esa qor kuchliroq yog‘di, stadion xodimlari va hatto mezbon jamoa murabbiylari ham «Terf Mur» o‘yingohi gazonini tozalashda yordam berishga harakat qilishdi, «Byornli» bosh murabbiyi Shon Daych esa bitta ko‘ylakda maydonga chiqib keldi. Qor yog‘ishi sekinlashmagach, APL rahbariyati o‘yinni qoldirishga qaror qildi.
Manchesterda ham qor yog‘di, ammo birinchi bo‘lim davomida ob-havo sharoiti yomonlashgan bo‘lsa-da, o‘ynash mumkin edi. Dastlab Mahrezning goli ofsayd tufayli bekor qilindi, ko‘p o‘tmay Gundo‘g‘an qorli sharoitda u qanotdan kuchli uzatilgan to‘pni kerakli yo‘nalishda darvozaga joylab qo‘ydi va u bu ishni shtatdagi forvardlardan yaxshiroq bajardi.
O‘yinda intriga so‘nggi daqiqalargacha saqlanib qoldi va Fernandino masalani hal qildi. U yanvar oyida «MYu»ga qarshi kechgan derbidan buyon gol urmayotgandi. «Vest Hem»ning javob goli juda kech urildi, jamoa Chempionlar ligasiga yo‘llanma beruvchi to‘rtlikdagi o‘rnini saqlab qolayotgan bo‘lsa-da, o‘yinda pasayish boshlangan. Londonliklar «Siti»ni qatorasiga 13 o‘yinda mag‘lub etolmayapti. Bu davrda ular 11 o‘yinda mag‘lub bo‘lishgan, to‘plar nisbati esa 6-35 ko‘rinishini olgan.
«Chelsi» — «Manchester Yunayted» — 1:1.
Ole Gunnar Sulsherning «Manchester Yunayted»dan iste'foga chiqarilishi va bosh murabbiylikka vaqtincha Ralf Rangnik olib kelinishi, doimiy murabbiy izlanayotgani (bu borada favorit — Maurisio Pochettino) — murakkab taqvim bilan bir vaqtga to‘g‘ri keldi. Avvaliga YeChLda «Vilyarreal» maydoniga safar qilindi. Endi — «Chelsi», keyingi turlarda «qizil iblislar»ni «Arsenal» va bu mavsumda yorqin o‘yin ko‘rsatayotgan «Kristal Pelas» kutmoqda. Va bularning barchasi bir necha kunlik tanaffuslar bilan bo‘lmoqda.
«Chelsi» hozirda yuqori sport formasida — ko‘klar barcha turnirlar doirasida 29 sentyabrdan buyon mag‘lub bo‘lmagan, o‘shanda ularni Turinda «Yuventus» to‘xtatgandi (0:1). To‘rt kun muqaddam londonliklar ishonchli revansh olishdi — 4:0.
Manchesterliklarning vaqtincha murabbiyi Maykl Karrik hafta o‘rtasida bo‘lgani kabi boshlang‘ich tarkib bilan barchani hayratga soldi — u Krishtianu Ronalduni zaxirada qoldirdi.
«Chelsi»da esa har qanday futbolchilar jamlanmasini — boshlang‘ich tarkib deb atash mumkin, jamoa zaxira o‘rindig‘i katta va kuchli futbolchilardan iborat. Romelu Lukaku bir oylik tanaffusdan keyin qatorasiga ikkinchi bor ko‘klarning zayavkasidan o‘rin oldi.
O‘yin «Chelsi» istagan ssenariy bo‘yicha boshlandi. 4-daqiqadayoq Kallum Hadson-Odoi «Manchester Yunayted» himoyachilari xatosidan keyin hisobni ochishi mumkin edi, ammo David De Xea jamoasini qutqardi. Ispaniyalik darvozabonda odatdagi kabi bu o‘yinda ham ish ko‘p bo‘ldi. Birinchi bo‘limda mezbonlar o‘n bor zarba berishdi, shundan to‘rttasi darvoza sohasiga aniq bordi. De Xea ayniqsa Antonio Ryudigerning jarima maydoni tashqarisidan bergan zarbasini qaytarish orqali muqarrar goldan qutqardi. Germaniyalik himoyachi «to‘qqizlik»ni aniq mo‘ljalga oldi, ammo darvozabon jarohat olish haqida o‘ylamay qaltis sakradi va to‘pni to‘sin yuqorisiga o‘tkazib yubordi. «MYu» muxlislari baxtiga De Xea tezda o‘ziga keldi.
Bo‘lim davomida «qizil iblislar» raqib darvozasiga birgina zarba yo‘llashdi, ammo shu ular tanaffusga qadar 0:0 hisobini saqlab qolish uchun yetarli bo‘ldi. Tanaffusdan keyin esa ular darhol hisobni ochishdi. «Manchester Yunayted» darvozasi oldida «standart» Brunu Fernandeshning to‘pni uzoqlashtirishi va Jorjino bu to‘pni qabul qilishda bolalarcha xato qilishiga olib keldi. Jyeydon Sancho maydon markazida to‘pni egallab olib, raqib jarima maydoniga qadar yugurib bordi, u bilan parallel holda yugurgan Markus Reshford unga Eduar Mendini osonlik bilan dog‘da qoldirishda yordam berdi.
Goldan keyin ham o‘yin kartinasi deyarli o‘zgarmadi. «Chelsi» bosim qilishda davom etdi va javob goli urilishi — faqat vaqt masalasi edi. Shunday ham bo‘lib chiqdi. «MYu» darvozasi tomon navbatdagi burchak zarbasi belgilanganida Aaron Van-Bissaka ehtiyotsizlik qildi. Himoyachi to‘pni uzoqlashtirishga uringanida Tiagu Silvani tepib yubordi, buning uchun Entoni Teylor penalti belgiladi va Jorjino hisobni tenglashtirdi.
Foto: ASH DONELON/GETTY IMAGES
Bu gol urilishidan oldinroq Krishtianu Ronaldu maydonga tushgandi. Bu o‘zgarishni ko‘pchilik payqamadi, chunki «Chelsi» o‘tkazib yuborilgan goldan keyin mehmonlarni maydon markazidan o‘tishga ham qo‘yishmagandi. O‘yin oxirigacha «Yunayted» yana bir zarba berishga ulgurishdi. Bunda Mendi yordam berib yubordi, uning uzatmasi Fredga borib tushdi, braziliyalik futbolchi esa darvozabonning xatosidan foydalana olmadi. O‘yinga qo‘shib berilgan daqiqalarda Ryudiger g‘alaba golini urishi mumkin edi, ammo uning jarima maydoniga kirmasdan yo‘llagan zarbasi to‘sindan biroz yuqori o‘tib ketdi.
«Chelsi» APLda «MYu»ga qarshi so‘nggi 8 o‘yinda g‘alaba qozona olmayapti (5 durang, 3 mag‘lubiyat). Shunga qaramay, Tuxel shogirdlari birinchi o‘rinni o‘zida saqlab qoldi, lekin «Manchester Siti» bilan oradagi farq bir ochkogacha qisqardi. «Manchester Yunayted» avtobus qo‘yish orqali ochko olgan bo‘lsa-da, turnir jadvalida 8-o‘ringa tushib ketdi.
Yaqindagina turnir peshqadami bo‘lib turgan «Real Sosedad» «Espanol»dan mag‘lub bo‘lgach, amaldagi chempionlarni ham oldinga o‘tkazib yuborib, uchinchi o‘ringa tushib qoldi. Basklar hamon yuqori sport formasini saqlab qolayotgan Diyego Lopesga gol ura olishmadi, ushbu faxriy futbolchi La ligada seyvlar soni bo‘yicha ham, qaytarilgan zarbalar ulushi bo‘yicha ham peshqadam. Yanuzay to‘pni aylantirib tepganida ham darvozabonga omad kulib boqdi va olis burchakka yo‘nalgan to‘p to‘singa tegdi. O‘z navbatida, Aleks Remiro de Tomasning zarbasini qaytargan bo‘lsa-da, venesuelalik Errera qaytgan to‘pni darvozaga joyladi.
«Atletiko» esa Kadisdagi o‘yinning birinchi bo‘limida birorta aniq zarba yo‘llamadi, ammo keyin ular mezbonlar mudofaasini parchalab tashladi. «Matraschilar»ni ranjitgan yagona holat — Oblakning kulgili gol o‘tkazib yuborgani bo‘lishi mumkin, lekin bu gol natijaga ta'sir ko‘rsatmadi. Diyego Simeone jamoasi «Milan»ga qarshi mag‘lubiyatdan keyin darhol o‘ziga kelgan, o‘sha o‘yin oxirida qulay vaziyatlarni yo‘qqa chiqargan Mateus Kunya va Grizmann bittadan gol urishdi. Fransuz Ispaniya chempionatida o‘ziga qarshi o‘ynagan 33 jamoaga gol urgan, u gol urmagan yagona klub — hozirgi klubidir.
Ispaniyada tur yetakchi va uning yaqin ta'qibchisi o‘rtasidagi o‘zaro o‘yin bilan yakunlab berildi. Sevilyaliklar azaldan «Santyago Bernabeu»da yaxshi natijalarga erisha olmay kelgan, ammo birinchi bo‘limda ularda hech qanday kompleks ko‘rinmadi. Aksincha, Xulen Lopetegi jamoasi tanaffusga qadar hisobni yirik ko‘rinishga keltirib qo‘yishi mumkin edi. O‘yinda hisobni ochgan bo‘lsa-da, keyingi hujumlar vaqtida Rafa Mir ketma-ket ikki vaziyatdan foydalana olmadi, avvaliga uning Kurtuadan o‘tkazgan zarbasini darvoza chizig‘i oldida Alaba qaytarib yubordi, to‘p yana hujumchiga kelib tushganida u darvozabonni alday olmadi, Okamposning Kazemironi aldab o‘tib, jarima maydoniga kirar-kirmas yo‘llagan zarbasi esa to‘singa tegdi.
Lekin «Real» kutilmagan joyda hisobni tenglashtirdi. Eder Militauda shunchaki hujumni rivojlantirish uchun variantlar yo‘q edi va u uzoq masofadan omadini sinab ko‘rishga qaror qildi. Lekin Bunu buni kutmagandi va qiyinchilik bilan to‘pga tegib, uni ustun tomon burib yubordi, ustundan qaytgan to‘pga esa Benzema yetib keldi. Ikkinchi bo‘limda Karlo Anchelotti jamoasi tashabbusni qo‘lga oldi va o‘yin oxiriga borib kuchi tugab qolgan andalusiyaliklarni uzil-kesil taslim qilishdi.
To‘pni qanotda qabul qilib, ikki himoyachini osonlik bilan ortda qoldirib, markaz tomon erkin harakatlangan va uchinchi himoyachidan o‘tkazib to‘pni uzoq burchak tomon yo‘llagan Vinisius Juniorning goli g‘alaba torti ustidagi bezakka aylandi. Benzema — Vinisius bog‘lami foyda keltirishda davom etadi (11+9), Kurtua esa so‘nggi daqiqalarda mo‘jiza ko‘rsatib, goldan qutqardi, «Real» ikkinchi o‘rin bilan oradagi farqni to‘rt ochkoga yetkazdi.
Italiya: «Milan»ning mag‘lubiyati va «Roma»ning Shomurodovsiz g‘alabasi
«Milan» terma jamoalar tanaffusidan keyin barchani hayron qoldirmoqda. Bungacha Chempionlar ligasida biror o‘yinda g‘alaba qozonmagan va 4 turdan keyin 1 ochko bilan so‘nggi o‘rinda turgan «rossoneri» Madridda «Atletiko»ni mag‘lub etdi. Ammo A Seriyada vaziyat butunlay teskarisi. Avvaliga chempionatda safar o‘yinida «Fiorentina»ga mag‘lub bo‘lindi. Endi Stefano Pioli jamoasi Roberto De Dzerbisiz ham hayot borligini isbotlashda davom etayotgan «Sassuolo»ga o‘z maydonida yutqazdi. Endi Alessio Dionizi boshqaruvida o‘ynayotgan qora-yashillar aprel oyida bo‘lgani kabi yana «San-Siro»da iroda ko‘rsatishdi.
A Seriyada 250-o‘yinida maydonga tushgan Berardi milanliklar o‘zining eng sevimli raqibi ekanini yana bir bor isbotladi. «Sassuolo» yetakchisi «Milan»ga qarshi 15 o‘yinda 10 urdi va yana to‘rt golli uzatma muallifi bo‘ldi. Ammo bu kechaning bosh yulduzi baribir — «to‘qqizlik»ka yo‘llangan kuchli zarbasi bilan hisobni tenglashtirgan Skamakka bo‘ldi, u g‘alaba golida ham katta ish bajardi, bu vaziyatda gol Ker nomiga avtogol bo‘lib yozildi.
Endi qora-yashillar bu muvaffaqiyatdan boshi aylanmasligi muhim. Ularning oldingi g‘alabasi bir oy muqaddam «Yuventus» maydonida qayd etilgan, ammo shundan keyin uch turda atigi bir ochko qo‘lga kiritib, avtoritetlarga tahdid soluvchi o‘rtamiyona jamoa bo‘lib qolgandi.
«Roma» — «Torino» — 1:0 (Abraham, 32)
Chempionatdagi ikki haftalik tanaffus Joze Mourino jamoasiga yordam bergani ko‘rinmoqda. «Roma» bir hafta ichidagi uch o‘yinni jami 7:0 hisobida foydasiga hal qildi. O‘tgan turda «Jyenoa»ga qarshi o‘yin oxirida qo‘lga kiritilgan g‘alaba futbolchilarni ruhlantirib yuborgani ko‘rinib turibdi. Lekin qayd etish kerakki, «bo‘rilar»ning so‘nggi raqiblari saviya jihatidan o‘zidan ancha past bo‘lgan jamoalar bo‘lmoqda (hafta o‘rtasida Konferensiyalar ligasida Ukrainaning «Zarya» klubi 4:0 hisobida taslim etildi).
Bu vaqtda Italiyada yana Mourino va Mxitaryanning munosabatlari murakkab ekani haqida mavzu ochildi. Go‘yoki armanistonlik yarimhimoyachi qishdayoq Rimni tark etishga tayyor va unda RPL klublaridan takliflar bor. Ammo Mxitaryanning so‘nggi o‘yinlaridagi harakatlari buni tasdiqlamayapti. U Genuyada hal qiluvchi golni tashkillashtirgandi, yakshanba kuni Abrahamga assistentlik qildi. Eldor Shomurodov esa tobora zaxira o‘rindig‘iga mixlanmoqda - «Jyenoa» bilan o‘yinda uning o‘rniga tushgan yosh hujumchi dubl qayd etgandi, «Zarya»ga qarshi o‘yinda esa u barcha masala hal bo‘lganida Dzanolani almashtirdi, «Torino»ga qarshi esa bir daqiqa ham o‘ynamadi.
Tur yakunlariga ko‘ra «Bayyer» uchinchi o‘ringa chiqib oldi, bunda leverkuzenliklarga «Frayburg»ning shanba kungi o‘yinda ochko yo‘qotishi qo‘l keldi. «Leypsig» Yulian Nagelsmann va qator yetakchilar ketgach avvalgi kabi kuchli va barqaror bo‘la olmayapti. Qolaversa, «xo‘kizlar» jamoasi muxlislar qo‘llab-quvvatlovidan ham mahrum bo‘lishgan, regionda joriy etilgan koronavirus cheklovlari tufayli uch tur o‘yiniga muxlislar kira olmaydi.
Lekin tribunalar to‘la bo‘lganida ham bu mehmonlarga qanchalik yordam berishi noma'lum edi. Birinchidan, ular «aspirinchilar»ning yulduzlari — Virs va Diabini to‘xtatishning imkonini topa olishmadi. Ikkinchidan, «Bayyer» safar o‘yinlarida hech qanday kompleks his qilmaydi. Bu chempionatda faqat Leverkuzen jamoasi begona maydonlarda yutqazmagan va safar o‘yinlaridan 15 ochko bilan qaytgan. «Leypsig» esa Sobosloi penaltini aniq ijro eta olmagani tufayli hisobni qisqartirolmadi va o‘yin oxiri intrigadan mosuvo bo‘ldi.
Kun statistikasi
Niderlandiya chempionatida «Ayaks» 6 turdan buyon gol o‘tkazmayapti va 2010 yildan buyon eng yaxshi quruq seriyani o‘tkazmoqda.
Arnautovich «Bolonya» safida 6 gol urib ulgurdi — u A Seriyada 1987/88 yilgi mavsumdan keyingi eng yaxshi avstriyalik legioner, o‘shanda Valter Shaxner («Avellino») va Toni Polster («Torino») 9tadan gol urishgan.
Germaniya chempionatining joriy mavsumida «Ayntraxt» futbolchilari 6 o‘yinda 90-daqiqadan keyin raqib darvozalariga gol urishdi.
«PSJ» yil boshidan buyon Liganing 11 o‘yinida raqibga birinchi bo‘lib hisobni ochish imkonini berishdi. Bu jamoaning 2012 yildan buyon eng yomon ko‘rsatkichi.
Liga 1 o‘yinlarida «Monako» sardori Ben Yyedder 21 marta penaltini aniq ijro etgan. Asrda boshidan buyon bu ko‘rsatkich borasida faqat ikki futbolchi Olive Monterryubo (26) va Zlatan Ibrahimovich (24) undan oldinda.
APLda 30 yoshdan keyin «Lester» hujumchisi Vardi 93 golni urdi, u afsonaviy Ian Raytning rekordini takrorladi.
La ligada 295 o‘yin o‘tkazgan «Betis» hujumchisi Xuanmi faoliyatidagi ilk het-trikni nishonladi.
