«Navoiyda qurilishlar asosan 3ta korxonaga berilgan». Tanish-bilishchilikka yo‘l qo‘ymaslik uchun respublika shtabi tuziladi

Aholini uy-joy bilan ta'minlash dasturi ijrosini samarali tashkil etish masalalari muhokamasiga bag‘ishlangan videoselektorda prezident Shavkat Mirziyoyev viloyatlarda uy-joy qurilishi uchun pudratchi tanlashda shaffoflik yo‘qligi bilan bog‘liq vaziyat haqida gapirdi.

«Viloyat hokimlari va ularning qurilish bo‘yicha o‘rinbosarlari uy-joy qurilishi uchun pudratchi tanlashda 2-3ta tashkilot bilan cheklanmoqda.

Misol uchun, Navoiyda deyarli barcha qurilishlar 3ta korxona tomonidan amalga oshirilmoqda («Minor Millenium», «Sharq jilov me'morlari», «Sharq qurilish»).

Buning salbiy oqibatlarini Jizzax misolida hamma ko‘rdi», degan davlat rahbari.

Shuningdek, qurilish sohasiga sarflangan har bir so‘m ega-egasigacha to‘liq yetib borishi zarurligi ta'kidlandi. Shu bois, kelgusi yildan davlat hisobidan bo‘ladigan qurilishlarda korrupsiyaga qarshi kurashish bo‘yicha yangi tizim yaratiladi.

Bosh prokuror o‘rinbosari boshchiligida respublika shtabi va viloyat shtablari tuziladi. Ular, qurilish narxlarini asossiz oshirish, raqobatni buzish, tasdiqlangan loyihalarni o‘zboshimchalik bilan o‘zgartirish, tanish-bilishchilikka yo‘l qo‘ymaslik ustidan qat'iy nazorat o‘rnatadi. Bu masalada banklar ham teng javobgar bo‘ladi.

Eslatib o‘tamiz, Jizzax viloyati hokimining sobiq o‘rinbosari Akrom Rahmonqulov 2018 yilda lavozimga tayinlangach, uyushgan jinoiy guruh tuzib, 494 milliard so‘mlik 82 ta obektda qurilish-ta'mirlash ishlarini o‘zining rahnamoligidagi 9 ta pudrat tashkilotiga topshirib, qurilish ishlari hajmini sun'iy ravishda oshirilgan narxlarda rasmiylashtirish, qo‘shib yozish orqali qariyb 20 milliard so‘mlik budjet mablag‘larini talon-toroj qilgandi. Bosh prokuratura bu hozirgacha tergovda aniqlangan ma'lumotlar ekanini aytgandi.

Shavkat Mirziyoyev 15 yanvar Akram Rahmonqulovni davlat siyosatiga xiyonat qilganlikda ayblab, viloyat hokimi o‘rinbosarining butun to‘dasiga qonuniy jazo ko‘rish kerakligini ta'kidlagandi.