Dam olish kunlari yomg‘ir yog‘ishi va havo haroratining me'yoriy qiymatlargacha pasayishi kutilmoqda

“O‘zgidromet” xabariga ko‘ra, ertaga Qoraqalpog‘istonda, Xorazm, Buxoro, Navoiy viloyatlarida, kechga tomon Samarqand, Qashqadaryo viloyatlarida ba'zi joylarda biroz yomg‘ir yog‘ishi mumkin. Buning sababi Kaspiy dengizidan nam havo massalari kirib kelishidir. Havo harorati kechasi 2-7 daraja iliqni tashkil etadi, kunduz kunlari 10-15 daraja iliqqacha pasayadi.

Yakshanba kuni O‘zbekistonning barcha hududlarida (Farg‘ona vodiysi viloyatlaridan tashqari) ba'zi joylarda biroz yomg‘ir yog‘adi, shimoliy tumanlarda yomg‘ir qorga aylanishi kutilmoqda. 

Respublika bo‘yicha ba'zi joylarda shamol tezligi 15-20 m/s gacha kuchayadi, kunduzi havo harorati pasayishda davom etadi va 4-9 daraja iliqdan yuqori bo‘lmaydi. Bunday harorat ushbu kun uchun o‘rtacha ko‘p yillik qiymatlarga yaqin bo‘ladi.