Bangladeshda paromda chiqqan yong‘inda 37 kishi halok bo‘ldi

Bangladesh janubida paromda chiqqan yong‘in oqibatida kamida 37 kishi halok bo‘ldi, 100dan ko‘proq kishi jarohatlandi. Bu haqda BBC News xabar berdi.

Ma’lumotlarga ko‘ra, voqea mahalliy vaqt bilan tungi soat 3da yuz bergan. Yong‘in mamlakat poytaxti Daqqadan Barguna shahriga yo‘l olayotgan paromda chiqqan. Fojia vaqtida paromda 500ga yaqin odam bo‘lgan. Ulardan ko‘pchiligi yong‘in boshlanganda uyquda bo‘lgan. Ba’zi odamlar yong‘indan qochib suvga sakragan. 

Dastlabki taxminga ko‘ra, yong‘in paromning mashina bo‘limida boshlanib, tezda butun kemaga tarqalgan.