Kattaqo‘rg‘onda tadbirkordan 2 000 dollar pora olgan xalq ta’limi bo‘limi mutaxassisi ushlandi

Samarqand viloyati Kattaqo‘rg‘on tumanida tadbirkordan 2 000 AQSh dollari pora olgan xalq ta’limi bo‘limi mutaxassisi ushlangan. Bu haqda Bosh prokuratura huzuridagi Iqtisodiy jinoyatlarga qarshi kurash departamenti xabar bermoqda.

Ma’lum qilinishicha, DXXning Kattaqo‘rg‘on shahar hamda Bosh prokuratura huzuridagi departamentning Kattaqo‘rg‘on tumani bo‘limlari tomonidan tadbirkorlik sub’yektlarining huquqlarini himoya qilish yuzasidan tezkor tadbir o‘tkazilgan.

Tadbirda Kattaqo‘rg‘on tumani xalq ta’limi bo‘limi mutaxassisi A.Sh. “L.S.” MChJ tomonidan tumandagi umumiy o‘rta ta’lim maktabida amalga oshirilgan 300 million so‘mlik joriy ta’mirlash ishlari bajarilgani haqidagi dalolatnomani XTB mudiriga tasdiqlatib berish evaziga 2 000 AQSh dollarini olgan vaqtida ashyoviy dalillar bilan ushlangan.

Qayd etilishicha, mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.