Toshkent viloyatida probatsiya hisobida turuvchi shaxslardan 2398 nafari 2021 yil davomida muddatidan ilgari shartli ravishda jazodan ozod etildi.
Sayyor sudlarda jazodan ozod etilganlar mehnatga halol munosabatda bo‘lgani va cheklovlarga to‘liq rioya etgani inobatga olingan. Bu haqda viloyat IIBB Probatsiya bo‘limi xabar qildi.
Shu bilan birga, sud tomonidan belgilangan cheklovlarga amal qilmay, jazoni o‘tashdan qasddan bo‘yin tovlab yurgani uchun 155 nafar shaxs ozodlikdan mahrum qilish joyiga qaytarilgan.
Qayd etilishicha, jazodan ozod qilingan shaxslarni ijtimoiy hayotga moslashtirish bo‘yicha 134 marta mehnat yarmarkasi tashkil etilib, ularning 3 793 nafari ishga joylashtirilgan. Shuningdek, 422 nafari kasbga yo‘naltirish bo‘yicha bepul o‘quv kurslariga borishi ta’minlangan, 220 nafari qayta kasbga yo‘naltirish bo‘yicha o‘qitilgan.
Probatsiya xizmati – axloq tuzatish, ozodlikni cheklash, muayyan huquqdan mahrum qilish va majburiy jamoat ishlari jazolarini, shuningdek, ozodlikdan mahrum qilish tariqasidagi jazoning o‘talmagan qismini axloq tuzatish, ozodlikni cheklashga almashtirilgan jazolarni ijro etish, shartli hukm qilingan va jazoni o‘tash muddatidan ilgari shartli ozod qilingan shaxslarning xulq-atvori ustidan nazorat qilish bo‘yicha vakolatli xizmat.
