Andijonda simyog‘ochga urilgan «Jiguli» ikkiga bo‘linib ketdi

Andijon viloyati Asaka tumanida «Jiguli» haydovchisi boshqaruvni yo‘qotib, simyog‘ochga urildi. Bu haqda viloyat Ichki ishlar boshqarmasi axborot xizmati xabar berdi.

Qayd etilishicha, hodisa 29-yanvar kuni soat 23:30 larda Asaka tumani, "Chek" MFY, Farg‘ona ko‘chasi hududidan o‘tgan 4R-112 "Farg‘ona halqa yo‘li"ning 167 kilometrida yuz bergan.

VAZ-2101 rusumli avtomashina haydovchisi boshqaruvni yo‘qotib, yo‘l chetidagi simyog‘ochga urilishi oqibatida yo‘l-transport hodisasi yuzaga kelgan. 

Voqea joyiga borib o‘rganilganda avtohalokat oqibatida avtomashina haydovchisi Farg‘ona viloyatida yashovchi, 1989-yilda tug‘ilgan fuqaro A.B. og‘ir tan jarohati olib, hushsiz holda shifoxonaga olib borilgan.

Hozirda Asaka tumani IIB tomonidan surishtiruv ishlari olib borilmoqda.