Qashqadaryoda o‘qituvchilarning pulini o‘zlashtirgan maktab direktori qamaldi

Qashqadaryo viloyati Shahrisabz tumanida qo‘l ostida ishlovchi o‘qituvchilarning pulini talon-toroj qilgan maktab direktori belgilangan jarimani to‘lamagani uchun 4 oy muddatga ozodlikdan mahrum etildi. Bu haqda MIB viloyat boshqarmasi xabar bermoqda.

Ma’lum qilinishicha, Shahrisabz tumanida yashovchi maktab direktori A.B. o‘z mansab vakolatidan foydalanib, qo‘l ostidagi o‘qituvchilarning pulini talon-taroj qilganligi sababli, Jinoyat kodeksining 167-moddasi «v», «g» bandlari hamda 209-moddasining 1-qismi bilan aybli deb topilgan.

Sud qarori bilan A.B. 1 yil muddatga mansabdorlik va moddiy javobgarlik lavozimlarida ishlash huquqidan mahrum qilinib, BHMning 100 baravari miqdorida, ya’ni 17 million 224 ming so‘m jarima jazosiga tortilgan.

Sud qarori ijrosini ta’minlash uchun MIB Shahrisabz tuman bo‘limi ijro harakatlariga kirishgan va A.B. belgilangan qarzdorlikni bartaraf etmagani, undiruvga qaratilishi mumkin bo‘lgan mol-mulki mavjud emasligi aniqlangan.

Shundan so‘ng davlat ijrochisi jinoyat ishlari bo‘yicha Shahrisabz tuman sudiga Jinoyat kodeksining 44-moddasiga asosan mazkur jazoni boshqa jazo turiga almashtirish to‘g‘risida taqdimnoma kiritgan.

Joriy yilning 1-fevral kuni sud holatni  ko‘rib chiqib, taqdimnomani qanoatlantirgan. Qarzdor A.B.ning 4 nafar voyaga yetmagan farzandi borligi va oilaviy sharoiti inobatga olinib, jazo turi 4 oy muddatga ozodlikdan mahrum qilish jazosiga almashtirilgan.