Jizzaxda fuqarolar nomiga kredit olib o‘zlashtirgan shaxsga jinoyat ishi qo‘zg‘atildi

Ma’lum qilinishicha, Bosh prokuratura huzuridagi departamentning Baxmal tuman bo‘limi tomonidan o‘tkazilgan tergovga qadar tekshiruvda aniqlanishicha, fuqaro S.D. fuqarolar J.T. va Sh.J.ning ishonchiga kirib, ularning nomiga yakka tartibdagi tadbirkorlik faoliyatini tashkil etgan.

So‘ng hududdagi tijorat banki filialidan hisobraqamini ochib, bank “mobile” ilovasi orqali 101 million so‘m onlayn kredit olishga erishib, ushbu kredit mablag‘ini o‘zining shaxsiy ehtiyojlari uchun ishlatib yuborgan.

Qayd etilishicha, mazkur holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilgan. Hozirda tergov harakatlari o‘tkazilmoqda.