Jizzaxda yuk mashinasi yonib ketdi

G‘allaorol tumanida yuk mashinasi yonib ketdi. Jizzax viloyati FVB yong‘in to‘g‘risida ma’lumot berdi.

Ma’lum qilinishicha, hodisa bugun tongda M-39 xalqaro avtomobil yo‘lida sodir bo‘lgan.

Jizzax viloyati FVBga “Samarqand-Toshkent” yo‘nalishida harakatlanib ketayotgan yuk mashinasida yong‘in sodir bo‘layotganligi to‘g‘risida xabar kelib tushgan. 2 ta yong‘in-qutqaruv ekipaji voqea joyiga yetib borib, yarim soatdan ko‘proq vaqtda yong‘inni o‘chirishgan. 

Hodisa oqibatida tan jarohati olganlar yo‘qligi bildirildi. Hozirda yong‘in sababi va zarari aniqlanmoqda.

Bu so‘nggi 20 kunda yo‘llarda yuk mashinasi yonishi bilan bog‘liq uchinchi holat: 16 may kuni Samarqandda hamda Piskentda yuk mashinalari yonib ketgandi.