O‘zbekiston va Islom taraqqiyot banki yangi hamkorlik dasturini ishlab chiqadi

Iqtisodiy imkoniyatlarni kengaytirish jamg‘armasi faoliyatini tashkil etish vazifalari ko‘rib chiqildi. Joriy yilning yanvar oyida xususiy investorlarni Jamg‘arma faoliyatida ishtirok etishga jalb qilish uchun ITB “roud-shou” o‘tkazgani aytib o‘tildi. Tomonlar shu yilning ikkinchi choragida jamg‘arma faoliyatini yo‘lga qo‘yish maqsadida tashkiliy va moliyaviy masalalarni jadal hal qilish bo‘yicha faol ish olib borishga sodiqligini bildirdi.

ITB bilan 2023-2025 yillarga mo‘ljallangan yangi hamkorlik dasturini birgalikda ishlab chiqish to‘g‘risida kelishuvga erishildi. Hamkorlikning ustuvor yo‘nalishlari yuzasidan fikr almashildi, ular qatorida aholi bandligi va malakasini oshirish, hududlar va qishloq joylarda xotin-qizlarning imkoniyatlarini kengaytirish, yoshlar tadbirkorligini rivojlantirish va startaplarni qo‘llab-quvvatlash, suv ta’minoti tizimlari, kanalizatsiya, kommunal va transport infratuzilmasini modernizatsiya qilish kabi yo‘nalishlar belgilab olindi. 

ITB tomonidan Arab muvofiqlashtirish guruhi bilan hamkorlikda yaratilgan SmartED yangi moliyalashtirish mexanizmidan foydalangan holda ta’lim tizimini takomillashtirishning dolzarbligi alohida ta’kidlandi.

Ma’lumot uchun, SmartEd dasturi qiymati 500 million dollardir. Dastur “Ta’lim sohasida global hamkorlik” moliyaviy platformasi tomonidan taqdim etilgan 100 million dollarlik grant moliyalashtirish paketini, shuningdek, imtiyozli moliyalashtirish paketini o‘z ichiga oladi va ITBga a’zo mamlakatlarda ta’lim loyihalarini qo‘llab-quvvatlashga qaratilgan.

ITB rahbariyati, shuningdek, savdoni moliyalashtirish hamda mamlakat tijorat banklari bilan hamkorlik qilishning boshqa moliyaviy vositalarini ishga solib, O‘zbekistonda kichik biznes va tadbirkorlikni qo‘llab-quvvatlashni kengaytirish imkoniyatlarini ko‘rib chiqishga tayyorligini bildirdi.

Odamlar zich, qishloq va chekka hududlarda yashovchi aholi uchun ta’lim sifatini yuksaltirish maqsadida O‘zbekiston hududlaridagi 400 ta maktabni rekonstruksiya qilish dasturini amalga joriy etish bo‘yicha ITB tomonidan qo‘shimcha mablag‘ ajratishning istiqbollari muhokama qilindi.

O‘zbekiston tomoni ITBning alohida chegara o‘tish punktlari imkoniyatlarini oshirish va samaradorligini yuksaltirishda texnik yordam ko‘rsatish hamda yo‘l harakati xavfsizligini boshqarish tizimini takomillashtirishga qaratilgan tashabbusini qo‘llab-quvvatlashini bildirdi. Ushbu sohaning bugungi holatini tahlil qilish hamda bu yo‘nalishda ilg‘or innovatsion ishlanmalar va amaliyotlarni joriy qilish bo‘yicha takliflar ishlab chiqish uchun O‘zbekistonga ekspertlar guruhini yuborish to‘g‘risida kelishuvga erishildi.