RF mudofaa vazirligi Ukrainaning 74 harbiy obekti yo‘q qilingani haqida xabar berdi. Shundan 11 tasi aerodromlar

Rossiyaning Ukrainaga qarshi harbiy amaliyoti davomida Ukraina qurolli kuchlari infratuzilmasining quruqlikdagi 74 obekti yo‘q qilingan. Bu haqda «Interfaks» RF mudofaa vazirligiga asoslanib xabar berdi.

Vazirlikning tasdiqlashicha, hujumlar natijasida Ukraina harbiy-havo kuchlarining 11 aerodromi, uchta boshqaruv punkti, Ukraina harbiy-dengiz kuchlarining tayanch punkti, shuningdek, 18ta S-300 va «Buk — M1» rusumli zenit-raketa majmualari radiolokatsiya stansiyalari yo‘q qilingan. Rossiyalik harbiylar jangovar vertolyot va «Bayraktar TB-2» rusumli to‘rtta uchuvchisiz uchish qurilmasini urib tushirgani ma’lum qilingan.

Harbiy amaliyotlar chog‘ida «texnik xatolik» tufayli rossiyaliklarning Su-25 shturmovigi qulagani, uchuvchi katapulta qilinib, bazaga qaytgani aytilgan.

RF mudofaa vazirligi rasmiysi Igor Konashenkov rossiyalik harbiylar «Ukraina shaharlariga ham, ijtimoiy obektlar va ukrain harbiy xizmatchilari va ularning oila a’zolari orasida qurbonlar bo‘lmasligi uchun harbiy garnizonlarga ham zarba bermayotgani»ni aytgan.