Makron Putindan tinch aholiga zarba berishni to‘xtatishni so‘radi. Putin urushni yakunlashi uchun shartlarini ilgari surdi

Fransiya prezidenti Emmanuel Makron telefondagi muzokaralar chog‘ida RF prezidenti Vladimir Putindan urushni va Ukrainaning tinch aholisiga zarba berishni to‘xtatishni so‘radi. Bu haqda fransuzlar yetakchisining tvitterida ma’lum qilingan.

Bundan tashqari, Makron Putinni Ukrainadagi avtomobil yo‘llari xavfsizligini ta’minlash hamda mamlakatdagi fuqarolik infratuzilmalarini saqlab qolishga chaqirgan.

O‘z navbatida, Kremldagilarning xabar berishicha, fransuz tomoni Rossiyaning «Donbass himoyasi bo‘yicha maxsus operatsiyasi» bo‘yicha «ma’lum qarashlarni ifodalagan», shuningdek, «Kiyev bilan muloqot va muzokaralar orqali hozirgi mojaro tezroq hal qilinishiga umid bildirgan».

Kreml xabarida aytilishicha, Putin Ukrainadagi mojaroni «Rossiyaning xavfsizlik sohasidagi qonuniy manfaatlarini so‘zsiz hisobga olgan holda» hal qilish mumkinligini aytgan. Bunday shartlar qatorida Rossiya prezidenti quyidagilarni sanagan:

• Rossiyaning Qrim ustidan suverenitetini tan olish;
• Ukrainani demilitarizatsiya va denatsifikatsiya qilish;
• Ukraina davlatining neytral maqomini ta’minlash.

Putin Rossiya tomoni Ukraina vakillari bilan muzokaralar uchun ochiqligi va ular «zarur natijalarni keltirishi»ni kutishini qayd etgan.

«Rossiya prezidenti Rossiya qurolli kuchlari tinch aholiga tahdid solmayotgani va fuqarolik obektlariga zarba bermayotganiga alohida e’tibor qaratdi. Xavf aholidan jonli qalqon sifatida foydalanib, qasddan turar joy kvartallariga zarbdor qurollarni joylashtirayotgan va Donbassdagi shaharlarni o‘qqa tutayotgan ukrain millatchilaridan keladi», — deyilgan xabarda.