Qashqadaryoda jazoni ijro etish koloniyasi xodimi mahkumdan pora olayotganda ushlandi

U mahkumga sharoit yaratish va uyali telefon olib kirib berish evaziga 1 600 dollar olgan.

Foto: iStock

Viloyat prokuraturasining xabar berishicha, 2022 yil 8 mart kuni fuqaro A.R.ning ariza yuzasidan viloyat prokuraturasi, IIB va departamentning viloyat boshqarmasi xodimlari hamkorligida tezkor tadbir o‘tkazilgan. Tadbirda 10-sonli jazoni ijro etish koloniyasi tezkor xodimi B.H. koloniyada jazo o‘tayotgan mahkum M.Yu.ga yengil shart-sharoitlar yaratish, unga uyali telefon apparati olib kirib berish evaziga 1 600 AQSh dollarini pora tariqasida olgan vaqtida ashyoviy dalillar bilan ushlangan.

Qayd etilishicha, mazkur holat yuzasidan Departamentning viloyat boshqarmasi tomonidan Jinoyat kodeksining 210-moddasi (pora olish) bilan jinoyat ishi qo‘zg‘atilib, viloyat prokuraturasi tomonidan dastlabki tergov harakatlari olib borilmoqda.

Avvalroq Qashqadaryoda teri-tanosil kasalliklari shifoxonasi bosh shifokori va “O‘zagroinspeksiya” inspektori pora olayotganda ushlangandi.