Davlat soliq qo‘mitasi o‘z oldiga qo‘yilgan vazifalarni so‘zsiz bajaradi - Qudbiyev 

Tadbir oldidan DSQ raisi Sherzod Qudbiyev OAV vakillari bilan muloqot qildi. Kun.uz muxbirining “So‘nggi voqealar fonida soliq prognozlariga o‘zgarishlar kiritilyaptimi?” degan savoliga u shunday javob berdi:

“Soliq qo‘mitasiga yillik prognozlar tasdiqlab berilgan, barcha parametrlar belgilangan. Sohamiz o‘z oldiga qo‘yilgan vazifaning so‘zsiz bajarilishini ta’minlaydi.

Bugun keng e’tibor qilayotganimiz – raqamlashtirish ko‘plab sohalarda shaffoflikni ta’minlayapti. Jumladan soliqqa tortishni ham. Bu orqali inson omili minimal darajaga tushirilyapti. Ko‘pchilik tushunmay tanqid qiladi, lekin soliq sohasida biror ko‘rsatkich ortga ketgani yo‘q. Aksincha, tadbirkorlik sub’yektlari soni ham, soliq tushumlari ham muntazam ortib boryapti. Chunki biz teng raqobat muhitini yaratishga harakat qilyapmiz.

Raqamlashtirish orqali biz tadbirkorlik sub’yektlarining nafaqat soliq hisobotlarini, balki elektr energiyasi, gaz, ijaraga olgan maydoni xarajatlari kabi tomonlarini ham taqqoslash imkoniga ega bo‘lyapmiz. 

Deylik, qaysidir sub’yekt 1 mlrd mablag‘ aylantirsa-yu, amalda biror ishchi ishlatmasa. Yoki katta miqdorda elektr energiyasi iste’mol qilib, hisob raqamida mablag‘ aylanmasa, shubhali emasmi. 

Yana bir jihat – tadbirkorlik faoliyati bilan shug‘allana turib, aniq bir noturar binoda faoliyat yuritmaslik ko‘p uchraydi. Bu qonun bo‘yicha mumkin emas va bu qonunni biz joriy qilmaganmiz. Mana shu jihatlarni shaffoflashtirish orqali birgina ijara bo‘yicha soliq tushumlari 40 foizga ortgani kuzatildi. Bu nimani anglatadi – soyadagi iqtisod yuzaga chiqayotganini bildiradi”, – dedi qo‘mita raisi.