Vazirlar Mahkamasining “Ayrim turdagi mahsulotlarni muddati o‘tgan yoki ishlab chiqarilgan sanasi ko‘rsatilmagan, shuningdek amaldagi qonunchilikka nomuvofiq qadoqlangan holda sotishda qayd etilgan huquqbuzarliklarga samarali kurashish bo‘yicha qo‘shimcha choralarni kuchaytirish to‘g‘risida”gi qarori loyihasi e’lon qilindi.
Jismoniy va yuridik shaxslarning foto, video va mobil vositalari orqali ayrim turdagi mahsulotlarni (oziq-ovqat, tibbiy, maishiy kimyo tovarlari) muddati o‘tgan yoki ishlab chiqarilgan sanasi ko‘rsatilmagan, amaldagi qonunchilikka nomuvofiq qadoqlangan holda sotishda qayd etilgan huquqbuzarlik holatlari to‘g‘risidagi videoyozuvlarni qabul qilish va ko‘rib chiqish tartibi to‘g‘risidagi nizom tasdiqlanadi.
Texnik jihatdan tartibga solish agentligi, Iste’molchilar huquqlarini himoya qilish agentligi, Davlat soliq qo‘mitasi bilan birgalikda 1 sentyabrga qadar markazlashtirilgan tizimga kelib tushayotgan videoyozuvlar bo‘yicha tizimli monitoring yuritish va protsessual harakatlarni amalga oshirish imkoniyatini nazarda tutgan holda, jismoniy va yuridik shaxslarning foto, video va mobil vositalari orqali qayd etilgan huquqbuzarlik holatlari to‘g‘risidagi videoyozuvlarni to‘plovchi markazlashtirilgan tizim ishga tushirilishini ta’minlaydi.
Bunda, loyiha-texnik hujjatlar ishlab chiqilib Axborot texnologiyalari va kommunikatsiyalarini rivojlantirish vazirligiga hamda “Kiberxavfsizlik markazi” DUKga ekspertizadan o‘tkazish uchun kiritiladi.
Jismoniy va yuridik shaxslarning foto, video va mobil vositalari orqali ayrim turdagi mahsulotlarni sotishda qayd etilgan huquqbuzarlik holatlari to‘g‘risidagi videoyozuvlarni qabul qilish va ko‘rib chiqish tartibi to‘g‘risidagi nizomga ko‘ra, qoidalar faqat ishlab chiqarish sanasi va amal qilish muddati ko‘rsatish talab etiladigan tovarlar bilan bog‘liq huquqbuzarliklarga nisbatan tatbiq etiladi.
Jismoniy va yuridik shaxslar videotexnika vositalari orqali ayrim turdagi mahsulotlarni (oziq-ovqat, tibbiy, maishiy kimyo tovarlari) muddati o‘tgan yoki ishlab chiqarilgan sanasi ko‘rsatilmagan, amaldagi qonunchilikka nomuvofiq qadoqlangan holda sotishda qayd etilgan huquqbuzarlik holatlarini qayd etishi hamda uch ish kuni ichida markazlashtirilgan tizim orqali O‘zbekiston texnik jihatdan tartibga solish agentligiga ko‘rib chiqish uchun yuborishi mumkin.
Videotexnika vositalari orqali qayd etilgan huquqbuzarlik holati to‘g‘risidagi videoyozuvda quyidagilar aniq aks ettirilishi lozim: huquqbuzarlik aniqlangan manzil, sana va vaqt; ishlab chiqilgan sana va muddatsiz mahsulotning partiyasi yoki birligi; aniqlangan mahsulotlarining miqdori; savdo nomi va ishlab chiqaruvchining (import qiluvchi) manzili.
