Sog‘liqni saqlash, ta’lim va bank hamon eng korrupsiyalashgan sohaligicha qolmoqda - Senat

Qayd etilishicha, o‘tgan yili 2020 yilga nisbatan javobgarlikka tortilgan shaxslar va sud organlariga yuborilgan ishlar o‘rtacha 3 baravar oshgan. Har yili korrupsiya jinoyatlari natijasida davlatga yetkazilgan moddiy zarar undirilmoqda.

“Sog‘liqni saqlash, ta’lim va bank sohalari hamon eng korrupsiyalashgan sohaligicha qolmoqda”, deyiladi Senat ma’lumotida.

Majlis ishtirokchilari qonun hujjatlarining korrupsiyaga qarshi ekspertizasini o‘tkazishga ham e’tibor qaratdi. 

Korrupsiyaga qarshi ekspertiza natijalariga ko‘ra, davlat xaridlari va sog‘liqni saqlash sohasidagi 25 ta normativ-huquqiy hujjatda 87 ta korrupsiya omili mavjud.

Majlis yakunida milliy kengashning tegishli qarori qabul qilindi va 2022-2023 yillarda sog‘liqni saqlash, qurilish, oliy ta’lim hamda davlat xaridlari tizimida “Korrupsiyasiz soha” loyihasini amalga oshirish bo‘yicha yangi “yo‘l xaritalari” tasdiqlandi.