Klopp Gvardiolani quvib o‘tolmadi. APLda finish yaqinlashmoqda, kimda qanday vaziyat?

Manchester Siti — Liverpul 2:2
10 aprel, «Etihad»
Gollar: de Bryuyne (5), Jyezus (36) — Jota (13), Mane (46).
Manchester Siti – Ederson, Uoker, Stounz, Laport, Kanselu, de Bryuyne, Silva, Rodri, Foden, Sterling (Mahrez, 75), Jyezus (Grilish, 83).
Liverpul – Alisson, Aleksander-Arnold, Matip, van Deyk, Roberson, Henderson (Keyta, 78), Tiago Alkantara, Fabino, Saloh, Mane (Firmino, 85), Jota (Dias, 70).
Ogohlantirishlar: Roberson (28), Bernardu Silva (40), Alkantara (61), Fabino (83), van Deyk (89).

Yangi klasiko
Ushbu o‘yin atrofidagi informatsiya foni alohida e’tiborga molik. Barcha ijtimoiy tarmoqlarda bu o‘yinni muhokama qilishdi: «eng yaxshi», «a’lo», «tarixdagi eng kuchlisi». Murabbiylarni ham, futbolchilarni ham, jamoalarni ham yaxshi so‘zlar bilan alqashdi. «Liverpul»ning sobiq himoyachisi Jyeymi Karrager qizillarning «Manchester Siti» bilan qarama-qarshiligini «Angliya futboli tarixidagi eng buyugi» deb atadi. 

«Liverpul» va «Siti» o‘rtasidagi jangni tarixiy o‘yinlar bilan tenglashtirish qiyin — masalan, «MYu» va «Arsenal» o‘rtasidagi asr boshidagi qarama-qarshilik darajasi bundan yuqoriroq edi. Bu qarama-qarshilikni bugungi kundagi muqobillar bilan solishtirish to‘g‘riroq bo‘ladi. So‘nggi mavsumlarda «Barselona» va «Real»ni jahon yulduzlari tark etishgach, klasiko ham avvalgidek emas, shu tufayli hozirda sayyoraning asosiy o‘yini tituli bo‘sh turibdi. Aytish mumkinki, aynan «Siti» va «Liverpul» o‘rtasidagi o‘yinni endi klasikoning muqobili deb atash mumkin — raqiblarning saviyasi va chempionatdagi intriga bo‘yicha ham.

Bu o‘yin — bu gaplarning navbatdagi isboti bo‘ldi.

Gvardiolaning pressingi
O‘yin arafasida «Liverpul» turnir jadvalida «Siti»dan atigi 1 ochko ortda edi, holbuki qishda buni tasavvur qilib bo‘lmasdi. Ammo 2 yanvardan buyon mersisaydliklar APLdagi barcha o‘yinlarda g‘alaba qozonishdi va chempionlik poygasini tiriltirishdi. Bundan tashqari, «Liverpul» hamon bu mavsumda poker qayd etish imkoniyatini saqlab qolmoqda — Liga kubogi olib bo‘lingan, yana uch titul qo‘lga kiritish mumkin.

Ammo, albatta, APLda g‘olib bo‘lish eng qiyini. Hatto oradagi farq qisqargan bo‘lsa ham.

Pep Gvardiola boshlang‘ich tarkib bilan barchani ajablantirdi: yanvardan buyon ilk bor Gabriel Jyezus ilk daqiqalardan maydonda harakat qildi, jamoaning joriy mavsumdagi eng ko‘p gol urgan futbolchisi Mahrez — zaxirada qoldi. Ehtimol, murabbiy bu orqali yuqori pressingga urg‘u qaratmoqchi bo‘lgan. Agar shunday bo‘lsa, uning bu rejasi o‘xshadi.

Birinchi bo‘limda «Siti» «Liverpul» himoyachilariga jarima maydoni chizig‘idayoq bosim o‘tkazib o‘ynadi, himoyachilarning har biriga hujum chizig‘ining bittadan vakili biriktirildi. Bunday doimiy pressing ostida xato qilmagan himoyachi qolmadi: van Deyk ham, Matip ham, Trent ham.

Qizillarning muvaffaqiyatsiz starti
Yurgen Klopp tarkib tanlashda hech qanday syurprizlar qilmadi. Lekin yuqori pressingdan bosh tortgani bilan ajablantirdi. Dastlabki 20 daqiqalikda «Liverpul» raqibni maydonning o‘z darvozasi tomonida kutib oldi va mezbonlar himoyadan sekinlik va ehtiyotkorlik bilan chiqib kelganiga qaraganda, ular ham bunday «iltifot»ni kutishmagandi.

Ammo hisobni aynan «Siti» ochdi, «Liverpul» himoyachilari bu vaqtda jarima maydoni yaqinidagi qoidabuzarlikdan keyin to‘p hakam hushtagisiz o‘ynab ketilishiga tayyor emasdi. Himoyachilar epizoddan uzilib qolishdi va De Bryuyne qarshiliksiz jarima maydoniga yaqinlashib kuchli zarba berdi. Belgiyalik futbolchiga to‘p Matipga tegishi ham qo‘l keldi va rikoshet orqali gol bo‘ldi.

«Liverpul» o‘yin startini barbod qildi va faqat birinchi bo‘lim o‘rtalariga borib, o‘z o‘yinini topib oldi, 24-daqiqada Jotaning bosimi ostida Ederson to‘p bilan birga darvozaga kirib ketishiga bir baxya qoldi.

Bu tasodif emasdi, «Liverpul» gol o‘tkazib yuborganidan keyin oldinroqda o‘ynay boshlagan va hisobni tenglashtirgandi - 1:1.

«Siti» «Liverpul»ga qaraganda ko‘proq nazorat qildi, ammo ko‘p hollarda yakuniy zarba berishga shoshilishmadi va ko‘p hollarda hujum burchak zarbasi bilan yakunlandi. Asosan faqat De Bryuyne to‘p o‘ziga kelganida darvozaga aniq zarba berishga harakat qildi. Hujumlardan biri baribir golga olib keldi — hujumning ikkinchi to‘lqinida: Jyezus Trentning ortida paydo bo‘ldi. Bo‘lim davomida «Siti» ikkinchi bor «Liverpul»ning ojiz nuqtasiga bosim o‘tkazdi: ikki holatda ham mehmonlar konsentratsiyani yo‘qotib, gol o‘tkazib yuborishdi.

«Liverpul»ning tanaffusga qadar bergan zarbalari juda kamtarona: biri — gol bilan yakunlangan hujumda, ikkinchisi — Trentning maydon markazidan yo‘llagan zarbasi, bu holatda Ederson qiyinchiliksiz to‘pni egallab oldi. Ammo ikkinchi bo‘lim boshlangach, 50 soniya o‘tib «Liverpul» darvoza sohasiga uchinchi zarbani berdi — va gol urdi. E’tiborli jihati, Manega Saloh golli pas berdi. Bungacha Misr Senegalga mag‘lub bo‘lib, JCh-2022 yo‘llanmasidan quruq qolgach, ikki futbolchining munosabatlari buzilgani haqida mish-mishlar tarqagandi.

«Liverpul» tanaffusdan keyin himoyada tartibli o‘ynay boshladi — bo‘shliqlar kamaydi va «Siti» futbolchilari ham raqib himoyachilari ortiga chopishni kamaytirishdi. Sterling darvozani ishg‘ol qilgan bo‘lsa-da, ofsayd qayd etildi. Umuman olganda, ikkinchi bo‘limda tezlik pasaydi — superodamlar ham 90 daqiqa davomida maydon bo‘ylab to‘xtovsiz yugura olishmaydi. Ammo Klopp ham, Gvardiola ham o‘yindagi tezlikni qaytarishga urinishdi: mehmonlar safida Luis Dias, mezbonlarda — Mahrez o‘yinga qo‘shildi.

Kolumbiyalik futbolchi maydonda deyarli sezilmagan bo‘lsa, jazoirlik «Siti»ga g‘alaba olib kelishi mumkin edi. Ammo avvaliga uning jarima nuqtasidan yo‘llagan zarbasi ustunga tegdi, qo‘shimcha daqiqalarda esa qarshi hujum vaqtida biroz yuqoriroqqa zarba yo‘lladi.

2:2 — raqiblardan birortasini qanoatlantirgani dargumon, ammo chempionlik uchun kurashdagi intriga saqlanib qoldi, bu o‘yin esa ikki jamoa ham chempionlikka munosib ekanini yana bir bor ko‘rsatib berdi.

Konte Chempionlar ligasi hududiga yorib kirdi

Everton – Manchester Yunayted 1:0
Gol: 1:0 – 27 Gordon.
Everton – Pikford, Koulmen, Godfri, Kin, Mikolenko, Delf (Dukure, 84), Allan, Ivobi, Kelvert-Lyuin (Grey, 71), Risharlison, Gordon.
Manchester Yunayted – De Xea, Uan-Bissaka, Maguayr, Lindelef, Telles, Matich (Mata, 64), Fred (Pogba, 36), Brunu Fernandesh, Ronaldu, Reshford (Elanga, 64), Sancho.
Ogohlantirishlar: Pogba (51), Gordon (75), Pikford (86), Ronaldu (87).

Frenk Lempard «Everton» bosh murabbiyligida qo‘rqinchli statistika qayd etmoqda. Agar kubok o‘yinlari chiqarib tashlansa, «irislar» APLda yangi murabbiy kelgach, 9 o‘yindan 7tasida yutqazishdi. Ammo bu «MYu»ga yordam bermadi, omadsiz va doim tanqidga uchrab keluvchi Maguayr Gordonning zarbasi yo‘lidan chiqdi va rikoshet De Xeani ilojsiz holatga tushirdi. Ralf Rangnik birinchi bo‘limdayoq Fred o‘rniga Pogbani tushirdi, ammo bu ham, boshqa o‘zgarishlar ham, jumladan qariyb bir yillik tanaffusdan keyin chempionat o‘yinida maydonga chiqqan ispaniyalik Mata ham yordam bermadi.

«Qizil iblislar»da o‘yin oxirida o‘yinni qutqarish uchun so‘nggi imkon yuzaga keldi, ammo Pikford Krishtianu Ronalduning kuchli zarbasini to‘sdi. Ushbu darvozabonning o‘yini tufayli Lempard nihoyat manchesterliklarni yengishni uddaladi, u  «Chelsi»dagi faoliyati davomida bunga erisha olmagandi,  Rangnikda esa APLdagi o‘yinlarda g‘olib bo‘lish ko‘rsatkichi 47 foizni tashkil etmoqda. «Arsenal» va «Tottenhem»ga yetib olish imkoni qo‘ldan boy berildi, jamoaning chempionlik uchun nazariy imkoniyatlari ham qolmadi va mavsum birorta sovrinsiz yakunlanishi rasman aniq bo‘ldi. Endi yozda Erik ten Haag jamoani qayta qurishga urinib ko‘radi.

O‘yindan keyin katta mojaro yuzaga keldi. Chempionatda qatorasiga to‘rtinchi o‘yinni golsiz o‘tkazgan Ronaldu tribuna ostidagi yo‘lakka kirishda mezbon jamoa fanatlaridan birining telefonini sindirgan. Keyinroq portugaliyalik  yulduz harakati uchun uzr so‘rab, yosh muxlisni «Old Trafford»dagi keyingi o‘yinga taklif etdi, ammo «Everton» muxlisi bo‘lgan bolaning onasi bu uzrni qabul qilmadi.

Sauthempton – Chelsi 0:6
Gollar: 0:1 – 8 Alonso, 0:2 – 16 Maunt, 0:3 – 21 Verner, 0:4 – 31 Xaverts, 0:5 – 49 Verner, 0:6 – 54 Maunt.
Sauthempton – Forster, Livramento (Smollboun, 73), Bednarek, Salisu, Uoker-Piters, Armstrong, Elyunussi, Romeu (Valeri, 36), Uord-Prouz, Armstrong (Diallo, 46), Adams.
Chelsi – Mendi, Tiago Silva (Jyeyms, 63), Ryudiger, Kristensen, Alonso, Loftus-Chik, Kovachich, Kante, Maunt (Ziyesh, 69), Haverts (Pulishich, 46), Verner.

Aftidan «Chelsi» o‘z maydonidagi qatorasiga ikki mag‘lubiyatdan keyin o‘ziga kelish uchun boshqa stadionda o‘ynab ko‘rishi kerak edi. Jamoa o‘z uyida «Brentford»dan to‘rt gol qabul qildi (1:4), keyin Chempionlar ligasida Benzema het-trik qildi (1:3). Ko‘klar baxtiga 3 martdan buyon g‘alaba neligini bilmayotgan «Sauthempton» mashg‘ulot manekenlari vazifasini o‘tab berdi. Mezbonlar Tomas Tuxel shogirdlari qarshisida shu qadar ojiz qolishdiki, londonliklar APLdagi ishtiroki davomida ilk bor birinchi bo‘limning 21-daqiqasiga kelib uch gol farqi bilan oldinga chiqib olishdi.

O‘yinda 2 gol va bir assistga mualliflik qilgan Maunt bu mavsumda «Chelsi»ning eng yaxshi to‘purari va eng yaxshi assistenti bo‘lib turibdi (9+8). Memlar qahramoni Verner uchun esa Angliyada «Sauthempton»dan qulayroq raqib yo‘q. Germaniyalik futbolchi ushbu jamoaga besh gol urgan — bu «Chelsi» safida boshqa jamoalarga urgan jami gollaridan ko‘p.

Barcha turnirlar doirasida «Chelsi» qatorasiga yettinchi safar uchrashuvida g‘olib bo‘ldi. Bu 1989 yilda o‘rnatilgan klub rekordi takrorlanishi hisoblanadi. 2019 yilda ham bu natija takrorlangan, ammo uni yangilashning imkoni bo‘lmagandi, ikkinchi urinish muvaffaqiyatli chiqishi uchun ko‘klar «Santyago Bernabeu»da g‘alaba qozonishi kerak bo‘ladi.

Arsenal – Brayton 1:2
Gollar: 0:1 – 28 Trossard, 0:2 – 66 Mvepu, 1:2 – 89 Edegor
Arsenal – Remsdeyl, Soaresh, Gabriel, Uayt, Jaka, Edegor, Lokonga, Smit-Rou (Nketia, 62), Lyakazett, Martinelli (Pepe, 74), Saka.
Brayton – Sanches, Dank, Veltman, Kukurelya, Uebster, Gross, Bissuma (Lallana, 74), Mvepu (Lempti, 77), Kaysedo, Mak Allister, Uelbek, Trossard.

To‘rtinchi o‘rinni egallashi kafolatlangandek ko‘ringan «Arsenal» uchun so‘nggi hafta qora haftaga aylandi. Dushanba kuni «kanonirlar» sensatsion ravishda «Kristal Pelas»ga yutqazishdi (0:3). Shanba kuni «Brayton»ga qarshi o‘yinda to‘liq ustunlikka ega bo‘lib ham yutqazishdi (1:2). «Chaykalar» raqib hujumi ostida to‘pni uzoqlashtirishdi va qarshi hujum vaqtida Trossar «to‘qqizlik»ni aniq nishonga oldi, bo‘lim oxirida Martinelli urgan gol esa videotakrordan keyin ofsayd qayd etilib, bekor qilindi.

Tanaffusdan keyin deyarli hech narsa o‘zgarmadi. «Arsenal» bosim qildi — golni raqib urdi. Bu safar Mvepu uzoq masofadan yerlatib kuchli zarba berdi, Edegorning goli esa o‘yinni qutqarish uchun juda kech urildi. Bu mag‘lubiyat «Tottenhem» uchun ajoyib sovg‘a bo‘ldi, londonliklar turning so‘nggi o‘yinida g‘alaba qozonib, asosiy raqibdan uch ochkoga o‘zib ketishi mumkin edi.

Aston Villa — Tottenhem 0:4
Gollar: Son (3, 66, 71), Kulusevski (50).
Aston Villa – Martines, Mingz, Konsa, Din (Yang, 80), Koutino (Buendia, 70), Makginn, Duglas Luis, Remzi, Kesh, Ingz (Beyli, 70), Uotkins. 
Tottenhem – Loris, Emerson, Dayyer, Devis, Romero, Doerti (Regilon, 21), Hyoyberg, Bentankur, Son (Moura, 78), Kulusevski (Bergveyn, 84), Keyn.
Ogohlantirishlar: Ingz (21), Hyoyberg (29), Emerson (74), Yang (82), Keyn (90+1).

«Shporlar» bu vazifani a’lo darajada uddalashdi va «Aston Villa»ning himoyasini tez va osonlik bilan yorib o‘tishdi. Ammo aytish kerakki, «Tottenhem» uchun ham bu o‘yin oson bo‘lgani yo‘q va Loris birinchi bo‘limning o‘zida yettita seyv qilishiga to‘g‘ri keldi. Bunday o‘yinda ikkinchi gol kerak edi va uning muallifi Londonga kelgach ochilgan Kulushevski bo‘ldi. Agar Antonio Konte mavsum yakunida Chempionlar ligasiga yo‘llanma beruvchi o‘rinni saqlab qolsa, ushbu shved futbolchisidan minnatdor bo‘lishi kerak, qishda «Yuventus»dan olib kelingan futbolchi italiyalik murabbiyning ishonchini oqladi.

Ammo, albatta, Son Xin Minni alohida e’tirof etish kerak, u nafaqat «Aston Villa»ni taslim etdi, bu kechada het-trik qayd etib, APLdagi gollari sonini 87taga yetkazdi. U bir kechada uch zarbasini golga aylantirib, Teves, Fernando Torres va Azarni ortda qoldirdi. «Tottenhem» esa «Arsenal»dan oldinga chiqib oldi, prinsipial raqibda o‘tkazilgan o‘yinlar soni kamroq bo‘lsa-da, taqvim «shporlar»da qulayroq.

32 turdan keyingi vaziyat

O‘zaro o‘yindan keyin «Manchester Siti»da 74 ochko, «Liverpul»da 73 ochko, shu bilan birga, Klopp jamoasida to‘plar nisbati yaxshiroq: 72:20 ga qarshi 79:22.

Qiziq tomoni Gvardiola mavsumning yakunlovchi turini Stiven Jyerrard boshqaruvidagi «Aston Villa»ga qarshi o‘tkazadi… Quyida jamoalarning taqvimi.

«Siti»: «Vulverhempton» (17 aprel, safar), «Brayton» (20 aprel, uy), «Uotford» (23 aprel, uy), «Lids Yunayted» (30 aprel, safar), «Nyukasl» (7 may, uy), «Vest Hem» (15 may, safar), «Aston Villa» (22 may, uy).

«Liverpul»: «Aston Villa» (16 aprel, safar), «Manchester Yunayted» (19 aprel, uy), «Everton» (24 aprel, uy), «Nyukasl» (30 aprel, safar), «Tottenhem» (7 may, uy), «Sauthempton» (15 may, safar, «Vulverhempton» (22 may, uy).

Yevrokuboklar hududi. «Arsenal» yoki «Tottenhem»?

Yevrokuboklarga o‘rin beruvchi uch o‘rin deyarli band, to‘rtinchi o‘rin bilan 5 ochkolik farqqa ega bo‘lib turgan «Chelsi» bu o‘rinni berib qo‘yishi dargumon, ammo to‘rtinchi o‘rin uchun jiddiy kurash kechadi. Avvaliga favorit — 2017 yildan buyon asosiy yevrokubokda o‘ynamagan «Arsenal» edi, terma jamoa o‘yinlari uchun qilingan tanaffusdan oldin Arteta shogirdlari zaxirada o‘yini bor holda eng yaqin ta’qibchisini uch ochkolik farq bilan ortda qoldirayotgandi, ammo tanaffusdan keyin qatorasiga ikki mag‘lubiya jamoaning holatini murakkablashtirdi, endi ko‘p narsa «Tottenhem» bilan o‘zaro o‘yin natijasiga bog‘liq bo‘ladi.

Bir muddat to‘rtinchi o‘rinda yurgan «Manchester Yunayted» qator muvaffaqiyatsizliklardan keyin yettinchi o‘ringa tushib ketdi va endi jamoa YeChL haqida unutsa ham bo‘ladi. Qolgan o‘yinlarda jamoa o‘ziga kela olmasa, Yevropa Ligasidan ham umid uzishi mumkin — bu turnirga faqat beshinchi o‘rinni egallagan jamoa boradi, Ronaldu va jamoa esa ayni vaqtda zaxirada bir o‘yini bor holda beshinchi o‘rinda borayotgan «Arsenal»dan uch ochko ortda.

«Arsenal»ni mavsumning qolgan qismida «Chelsi», «MYu» va «Vest Hem» kabi kuchli raqiblar ham kutmoqda. «Tottenhem»da esa jiddiy raqiblardan faqat — «Liverpul», lekin chempionlik uchun kurashayotgan mersisaydliklar birorta ochko yo‘qotishga rozi bo‘lmaydi. «Yunayted»ning muvaffaqiyatsizliklari tufayli oltinchi o‘ringa chiqib olgan «Vest Hem»da ham vaziyat yaxshi emas, Moyyes shogirdlari so‘nggi turda «Brentford»ga yutqazishdi va «Yunayted»dan bitta ko‘p o‘yin o‘tkazishgan. Bu jamoani keyingi turlarda «Chelsi», «Arsenal» va «Siti» kabi raqiblar kutmoqda. «Yunayted»ning jiddiy raqiblari esa — «Liverpul», «Arsenal» va «Chelsi».

«Tottenhem»: «Nyukasl» (3 aprel, uy), «Aston Villa» (9 aprel, safar), «Brayton» (16 aprel, uy), «Brentford» (23 aprel, safar), «Lester» (30 aprel, uy), «Liverpul» (7 may, safar), «Arsenal» (12 may, uy), «Byornli» (15 may, uy), «Norvich» (22 may, safar).

«Arsenal»: «Sauthempton» (16 aprel, uy), «Chelsi» (20 aprel, safar), «Manchester Yunayted» (23 aprel, uy), «Vest Hem» (1 may, safar), «Lids» (7 may, uy), «Tottenhem» (12 may, safar), «Nyukasl» (15 may, safar), «Everton» (22 may, uy).

«Vest Hem»: «Byornli» (17 aprel, uy), «Chelsi» (24 aprel, safar), «Arsenal» (1 may, uy), «Norvich» (7 may, safar), «Manchester Siti» (15 may, uy), «Brayton» (22 may, safar).

«MYu»: «Norvich» (16 aprel, uy), «Liverpul» (19 aprel, safar), «Arsenal» (23 aprel, safar), «Brentford» (2 may, uy), «Brayton» (7 may, safar), «Chelsi» (15 may, uy), «Kristal Pelas» (22 may, safar).

Xavfli hudud. Qimmat tarkib «Everton»ni qutqarolmaydimi?

Turnir jadvalining quyi qismida jamoalar tig‘iz joylashgan. Tanaffusdan oldin «Norvich» umidsiz holatda edi (qatorasiga olti mag‘lubiyat va 17 ochko bilan so‘nggi o‘rin). Ammo jamoa tanaffusdan keyin ikki o‘yinda 4 ochko olib, vaziyatini yaxshiladi, avvaliga «Brayton»dan ochko oldi (0:0), keyin to‘g‘ridan to‘g‘ri raqib «Byornli»ni mag‘lub etdi (2:0). Jamoa hozir ham oxirgi o‘rinda, ammo endi 19-o‘rin bilan oradagi farq avvalgidek 4 mas, 1 ochkoni tashkil etmoqda. Jamoaning navbatdagi raqiblari orasida YeChL va YeL o‘rinlari uchun kurashayotgan «MYu», «Vest Hem», «Vulverhempton» va «Tottenhem» kabi klublar bor, shunday ekan, jamoaning ligada qolish imkoniyatlari yana pasayadi.

Tarkibidagi futbolchilar qiymati qariyb 500 mln yevroni tashkil etadigan «Everton» ham Chempionshipga tushib ketish xavfi ostida qolmoqda. Hozirda «irislar» «Norvich», «Byornli» va «Uotford» uchligidan iborat xavfli hududdan atigi 4 ochko oldinda.

Eng yaxshi taqvim «Byornli»da. Shon Daychning top-raqiblari orasida  «Siti» va «Tottenhem» bor, ammo jamoa «Aston Villa»ga qarshi zaxira o‘yiniga ega. «Uotford»ni esa «Liverpul», «Siti» va «Chelsi»ga qarshi o‘yinlar, «Everton»ni — «Liverpul», «Chelsi» va «Arsenal» kutmoqda.

«Norvich»: «MYu» (16 aprel, safar), «Nyukasl» (23 aprel, uy), «Aston Villa» (30 aprel, safar), «Vest Hem» (7 may, uy), «Lester» (11 may, safar), «Vulverhempton» (15 may, safar), «Tottenhem» (22 may, uy). 

«Uotford»: «Brentford» (16 aprel, uy), «Manchester Siti» (23 aprel, safar), «Byornli» (30 aprel, uy), «Kristal Pelas» (7 may, safar), «Everton» (11 may, uy), «Lester» (15 may, uy), «Chelsi» (22 may, safar).

«Byornli»: «Vest Hem» (17 aprel, safar), «Sauthempton» (21 aprel, uy), «Vulverhempton» (24 aprel, uy), «Uotford» (30 aprel, safar), «Aston Villa» (7 may, uy), «Tottenhem» (15 may, safar), «Nyukasl» (22 may, uy).

«Everton»: «Kristal Pelas» (16 aprel, uy), «Lester» (20 aprel, uy), «Liverpul» (24 aprel, safar), «Chelsi» (1 may, uy), «Lester» (7 may, safar), «Uotford» (11 may, safar), «Brentford» (15 may, uy), «Arsenal» (22 may, safar).

To‘purarlar poygasi. Son Xin Min Salohga chaqiriq yo‘lladi

Mavsumning birinchi qismida yetarlicha gol urib olgan Saloh yaqqol peshqadam edi, ammo misrlik futbolchi terma jamoa bilan avvaliga Afrika kubogida, keyin JCh-2022 saralashida ishtirok etdi, klubda so‘nggi vaqtlarda samaradorligini pasaytirib yubordi. «Liverpul» hujumchisi shunga qaramay 29 o‘yinda 20 gol bilan birinchi o‘rinda (beshtasi — penaltidan). Son Xin Min esa so‘nggi ikki o‘yinda 4 gol urdi va gollari sonini 17taga yetkazib olgan (penaltidan gol urmagan).

Top-4 da misrlik to‘purarning jamoadoshlari — Diogu Jota (15) va Sadio Mane (13) ham bor. 37 yoshli Krishtianu Ronaldu 12 gol bilan beshinchi bo‘lib turibdi. Shuningdek, Harri Keyn va «Brentford» hujumchisi Ayvan Toni ham 12tadan golni o‘z hisobiga yozib qo‘yishgan.

So‘nggi ikki mavsumda APLda chempionlik intrigasi kuzatilmayotgandi. Kovid yilida sovrinni raqiblarga hech qanday imkon qoldirmagan «Liverpul» qo‘lga kiritgan, keyingi mavsumda esa xuddi shu holat «Siti» bilan sodir bo‘lgandi. Endi esa haqiqiy qirpichoq boshlanmoqda.