Pensiya tizimida yangi nafaqa turi tashkil etildi

Prezidentning tegishli farmoni bilan 2022 yil 1 apreldan e’tiboran o‘zgalar parvarishiga muhtoj, nogironligi bo‘lgan 18 yoshgacha bo‘lgan bolalarning parvarishi bilan band bo‘lgan bolaning qonuniy vakiliga har oyda 500 000 so‘m miqdorida nafaqa to‘lovi joriy etildi. Bu haqda Pensiya jamg‘armasi axborot xizmati xabar bermoqda.

Qayd etilishicha, parvarishlash nafaqasi fuqarolarning Davlat xizmatlari markazlari yoki Yagona interaktiv davlat xizmatlari portali (YaIDXP)ga qilgan murojaatlari asosida Pensiya jamg‘armasining tuman (shahar) bo‘limlari tomonidan mavjud bo‘lgan elektron ma’lumotlarga asosan tayinlanadi va to‘lanadi.

Avvalroq, mahkumlarning koloniyadagi ish stajini umumiy stajga qo‘shib hisoblash tartibi joriy etilishi mumkinligi ma’lum qilingandi.

Shuningdek, ijtimoiy tarmoqlarda may oyidan O‘zbekistonda nafaqa va pensiyalar miqdori 10 foizga oshirilishi haqida xabarlar tarqalgandi.