Navoiy va Nijyegorod viloyatlari o‘zaro hamkorlikni yo‘lga qo‘yadi

Navoiy viloyati va Rossiyaning Nijyegorod viloyati o‘rtasida hamkorlik memorandumi imzolandi.

Foto: Navoiy viloyati hokimligi

Toshkentda o‘tayotgan “INNOPROM. Markaziy Osiyo” xalqaro sanoat ko‘rgazmasida Navoiy viloyatidan 30 dan ortiq sanoat korxonasi o‘zlarining 100 dan ortiq mahsulotlari bilan qatnashmoqda.

Hokimlik axborot xizmatining Kun.uz’ga ma’lum qilishicha, ko‘rgazmaning ilk kunida Navoiy viloyati va Rossiyaning Nijyegorod viloyati vakillari o‘rtasida uchrashuv o‘tkazilgan. Unda o‘zaro hamkorlik masalalari muhokama qilingan.

Muzokaralar yakunida Navoiy viloyati hokimi vazifasini bajaruvchi Normat Tursunov hamda Nijyegorod viloyati gubernatori Gleb Nikitin tomonidan ikkala hudud o‘rtasida o‘zaro anglashuv memorandumi imzolangan. Memorandumga ko‘ra viloyatlar o‘rtasida savdo-iqtisodiy va madaniy-gumanitar sohalarda hamkorlikni yo‘lga qo‘yish ko‘zda tutilmoqda.