Olmaota – Toshkent – Olmaota yo‘nalishida «Tulpor Talgo» poyezdi qatnovi qayta tiklandi

O‘zbekiston Transport vazirligi axborot xizmati xabariga ko‘ra, ikki yarim yillik tanaffusdan so‘ng ilk bor O‘zbekistonga qarab yo‘l olgan ushbu poyezd kecha soat 11:05 da Toshkent Markaziy temiryo‘l vokzaliga kirib keldi. 

Tarkibi 24 ta yo‘lovchi vagondan iborat bo‘lgan poyezd bir tomonga harakatlanganda 425 nafar yo‘lovchini o‘z manziliga yetkazib qo‘yish imkoniyatga ega. 

Harakat jadvaliga ko‘ra ushbu poyezd haftaning dushanba, chorshanba va shanba kunlari “Olmaota-2 temiryo‘l vokzalidan soat 18:32 da, shuningdek, haftaning seshanba, payshanba hamda yakshanba kunlari soat 12:39 da – Toshkent markaziy temiryo‘l vokzalidan harakatini amalga oshiradi.

Bundan avval O‘zbekiston va Qozog‘iston o‘rtasida yo‘lovchi poyezdlari qatnovi tiklanayotgani xabar berilgandi.