Oliy Majlis Qonunchilik palatasining 3 iyun kungi majlisida transport vaziri Ilhom Mahkamov hisobot berdi.
Vazir hisobotida tez-tez ko‘tariladigan muammolarga to‘xtalarkan, harakat tarkiblarining yetishmasligi asosiy masala ekanini urg‘uladi.
“Hozirgi kunda mavjud poyezdlar tarkibini to‘ldirish uchun 120 ta vagonga ehtiyoj mavjud. Yo‘lovchi poyezdlarida ma’nan eskirgan vagonlarning xizmat ko‘rsatishi va ulardagi salbiy sanitar holatlar, yuqori tezlikda harakatlanadigan poyezdlarga talabning yuqori bo‘lgani sababli chipta yetishmovchiligi mavjudligi… Tahlillarga ko‘ra, chipta xarid qilish istagini bildirgan fuqarolarning kamida 30 foizi chipta defitsiti sababli chipta xarid qilish imkoniyatiga ega emas”, - dedi u.
Mahkamovning qayd etishicha, qo‘shimcha yo‘lovchi poyezdlar qatnovini tashkil etish uchun yo‘l infratuzilmasi mavjud emas. Hozirgi vaqtda Toshkent–Samarqand uchastkasi eng qatnovi tirband bo‘lgan uchastka hisoblanib, yuk va yo‘lovchi poyezdlar harakati maksimal tarzda tashkil etilgan. Shu sababli ushbu uchastkada qo‘shimcha poyezdlar qatnovini yo‘lga qo‘yishda har doim murakkabliklar yuzaga keladi.
Soha rahbari respublikaning ba’zi hududlarida shahar atrofida harakatlanuvchi yo‘lovchi poyezdlar harakati tashkil etilmagani, temiryo‘l vokzallarida yo‘lovchilar uchun taklif etiladigan servis xizmatlari sifati yetarli darajada emasligini ham qo‘shimcha qildi.
Ilhom Mahkamov deputatlardan aholi istagi va muammolarini yetkazib berishni so‘radi.
Uning ta’kidlashicha, 2025 yil 30 dekabr kuni imzolangan “2030 yilga qadar temir yo‘l transportida mahalliy yo‘nalishlarda yo‘lovchi tashish ko‘rsatkichlarini oshirish chora-tadbirlari to‘g‘risida”gi prezident qarori bilan, 2030 yilgacha temiryo‘l transporti yo‘lovchi tashish infratuzilmasini rivojlantirish va harakatdagi tarkibni yangilash dasturi qabul qilinib, aholiga xavfsiz va sifatli transport xizmatlari ko‘rsatilishini ta’minlash, 2030 yilga qadar respublikaning barcha hududlarini yuqori tezlikdagi va tezyurar elektropoyezd qatnovi bilan qamrab olish belgilangan.
Majlisda deputatlar ta’til vaqtlarida transportga talab oshishi, shunday vaziyatlarni oldindan bilish qiyin emasligi, lekin qo‘shimcha vagon va reyslarni tashkil etish yetarlicha ta’minlanmayotganini ta’kidlab, vazirdan aniq yechim so‘radi.
Mahkamovning so‘zlariga ko‘ra, Hayit bayrami kunlari barcha harakat tarkiblari 30 foizga oshirilgan va bu allaqachon tajribaga aylangan.
