O‘zbekiston Xitoyga 132,8 mln dollarlik gaz yetkazib berdi

Qayd etilishicha, O‘zbekistondan Xitoyga gaz yetkazib berish qiymati 2021 yilning shu davriga nisbatan ikki baravarga oshdi. O‘zbekiston Xitoyga quvur orqali gaz yetkazib beruvchi yetakchi beshta davlat qatoriga kirdi. 

Turkmaniston 4 oy ichida 2,87 mlrd dollar daromad olib, birinchi o‘rinni saqlab qoldi. Keyingi o‘rinlardan Rossiya – 1,04 milliard dollar, Myanma – 408 million dollar va Qozog‘iston joy oldi – 270 million dollar.

Xitoy Avstraliyadan dengiz orqali yuborilgan 7,49 million tonna suyultirilgan gazni 5,38 milliard dollarga sotib oldi. Undan keyingi o‘rinlarda Qatar (3,57 milliard dollar), Malayziya (2,88 milliard dollar), Rossiya (1,32 milliard dollar) va Indoneziya (1,01 milliard dollarga) bormoqda. 

Yanvar-aprel oylarida Xitoyga Rossiya neftining importi o‘tgan yilning shu davriga nisbatan 7,4 foizga qisqarib, 25,6 million tonnani tashkil etdi. Jismoniy hajmning qisqarganiga qaramay, Xitoy tomonidan Rossiyadan sotib olingan neft narxi 4 oy ichida 40 foizga oshib, 17,11 milliard dollarni tashkil etdi.