RT telekanali Ukrainada bedarak yo‘qolgan AQSh harbiylari aks etgan videoni namoyish etdi 

Rossiyaning RT davlat telekanali urush paytida Ukrainada g‘oyib bo‘lgan amerikalik harbiylar aks etgan videoni e’lon qildi. Jurnalist Roman Kosarev 17 iyun, juma kuni kechqurun Telegram messenjerida o‘zini sobiq amerikalik harbiy xizmatchi Aleksandr Dryuke deb tanishtirgan shaxs onasiga murojaat qilgan videoni joylashtirdi, u tirik ekani va imkon qadar tezroq uyiga qaytishga umid qilayotganini aytgan. 

Xuddi shu kuni RT Telegram-kanalida Endi Hyun bilan intervyu paydo bo‘ldi, u Dryuke bilan Ukrainaning Xarkov viloyatida «rus qo‘shinlariga qarshi janglarda» qatnashganini bildirgan. Aytilishicha, Dryuke va Hyun Ukraina armiyasi tomonida ko‘ngillilar sifatida jang qilgan. RT tomonidan e’lon qilingan videoda Hyun Dryuke bilan Xarkov viloyatidagi otishmalar paytida orqaga chekinganini va Rossiya armiyasiga taslim bo‘lishdan oldin bir necha soat yashiringanini ta’kidlagan. 

Xabar e’lon qilinayotgan vaqtda amerikalik harbiy xizmatchilarni kim asirga olgani va suratga olish tafsilotlari haqida hech qanday ma’lumot kelib tushmagan. 

AQSh Davlat departamenti vakilining aytishicha, Qo‘shma Shtatlar rasmiylari «Ukrainada Rossiya kuchlari tomonidan qo‘lga olingani xabar qilingan» ikki amerikalikning fotosuratlari va videolarini ko‘rgan. AQSh hukumati vaziyatni diqqat bilan kuzatib bormoqda. 

O‘z navbatida, AQSh prezidenti Jozef Bayden vatandoshlarini Ukrainaga sayohat qilishdan tiyilishga chaqirdi. Avvalroq Oq uy Ukrainada AQShning uchinchi fuqarosi bedarak yo‘qolganini ma’lum qilgandi. 

Iyun oyi boshida o‘zini «Donetsk xalq respublikasi» deb e’lon qilgan hududning «Oliy sudi» Buyuk Britaniya fuqarolari Shon Pinner va Eyden Aslinni, shuningdek, Marokash fuqarosi Saadun Brahimni Ukraina tomonidagi jangovar harakatlarda qatnashganlikda ayblab, o‘lim jazosiga hukm qildi.