To‘qayev Rossiya taklif etgan ordenni rad etdi - OAV

Siyosatshunos Yerbol Yedilovning yozishicha, Rossiya tomoni Qosim-Jo‘mart To‘qayevga Aleksandr Nevskiy ordeni bilan mukofotlashni taklif qilgan. To‘qayev bu taklifni rad etgan.

Foto: Akorda.kz

Qozog‘iston prezidenti Qosim-Jo‘mart To‘qayev prezidentlik vakolati yakunlanmagunicha milliy va xorijiy mukofotlarni olmaslikka qaror qildi, deb xabar berdi Tengrinews.kz.

Siyosatshunos Yerbol Yedilovning yozishicha, Rossiya tomoni Qosim-Jo‘mart To‘qayevga Aleksandr Nevskiy ordeni bilan mukofotlashni taklif qilgan.

"Davlat rahbari ushbu e’tirof uchun minnatdorlik bildirdi. Ammo u prezidentlik vakolati yakunlanmagunicha milliy va xorijiy mukofotlarni olmaslikka qaror qilgan. Shu sababli prezident Bishkekka tashrifi chog‘ida birinchi darajali "Manas" ordenini olishni rad etgan", - deb yozgan u.

Xabar berilishicha, To‘qayevning matbuot kotibi Ruslan Jyeldibay ushbu ma’lumotni tasdiqlagan.

Avvalroq Qosim-Jo‘mart To‘qayev Peterburg iqtisodiy forumidagi chiqishida uning mamlakati o‘zini o‘zi mustaqil deb e’lon qilgan Donetsk va Lugansk xalq respublikalarini tan olmasligini aytgandi.