Shavkat Mirziyoyev Eron islomiy kengash majlisi raisini qabul qildi

Prezident matbuot kotibi Sherzod Asadovning xabar qilishicha, ikki mamlakat o‘rtasidagi ko‘p qirrali hamkorlikni yanada kengaytirish masalalari ko‘rib chiqildi.

Shuningdek, rasmiy xabarda aytilishicha, davlat rahbari hamda Eron islomiy kengash majlisining raisi mintaqaviy sheriklikni rivojlantirish borasida fikr almashdi.

Bundan oldin Qonunchilik palatasida parlament quyi palatasi spikeri Nuriddin Ismoilov Eron islomiy kengash majlisi raisi Muhammad Boqir Qolibof boshchiligidagi delegatsiya bilan uchrashuv o‘tkazgandi.

Uchrashuv chog‘ida O‘zbekiston-Eron o‘rtasidagi parlamentlararo hamkorlik aloqalarini kengaytirish, uni yangi mazmun bilan boyitish, norma ijodkorligi sohasida tajriba almashish masalalari muhokama qilindi.

Tomonlar O‘zbekiston va Eron o‘rtasidagi amaliy hamkorlikni har tomonlama mustahkamlashda parlamentlar rolini kuchaytirishga kelishib oldi.