15:35 / 15.07.2022
10971
Шавкат Мирзиёев ва Сердар Бердимуҳамедов Самарқандда Ислом Каримов мақбарасини зиёрат қилди

Туркманистон президенти Сердар Бердимуҳамедовнинг Самарқандга ташрифи Ислом Каримов мақбараси зиёратидан бошланди. 

Фото: Президент матбуот хизмати

Президент матбуот хизмати хабарига кўра, у давлат раҳбари ҳамроҳлигида мажмуага бориб, биринчи президент қабрига гул қўйди. Қуръон оятлари ўқилиб, дуо қилинди.

Туркманистонлик меҳмонлар Мирзо Улуғбек музей-мажмуасини бориб кўрди. Ушбу мажмуа буюк олим қурдирган расадхона ёнида ташкил этилган. Музей икки зал ва олти бўлимдан иборат. Ундан Мирзо Улуғбек даврига оид юздан зиёд ашёлар, китоблар, қўлёзмалар, асл нусхадаги квадрант асбоби ўрин олган. 

Ўзбекистон ва Туркманистон президентлари Амир Темур мақбарасини ҳам зиёрат қилди. Қуръон тиловат қилинди. Меҳмонларга буюк соҳибқироннинг ҳаёти, саркардалик маҳорати, улкан давлати ҳақида сўзлаб берилди. 

Давлат раҳбарлари Регистон мажмуасига ташриф буюрди. Мажмуадаги уч муҳташам обида – Мирзо Улуғбек, Шердор ва Тиллакори мадрасалари тарихи ҳақида сўзлаб берилди. Халқ меъморчилик анъаналари, мақбаралардаги нақшлар ва маънолар меҳмонларда катта қизиқиш уйғотди.

Шавкат Мирзиёев ва Сердар Бердимуҳамедов шу ерда эсдалик учун суратга тушди, дейилади расмий хабарда. 

Top