Berlin Putinni Germaniyaga qarshi gaz dastagidan foydalanishda aybladi

Rossiya gazining «Shimoliy oqim» quvuri orqali yetkazib berish qayta tiklanishi Rossiyaning ishonchliligi belgisi sifatida ko‘rilmasligi kerak, deya ogohlantirdi Germaniya iqtisodiyot vaziri va vitse-kansler Robert Habek. Rossiya prezidenti Vladimir Putin Germaniya va Yevropani ikkiga bo‘lish uchun o‘zining strategik maqsadlarida bir necha bor gaz ta’minotidan foydalangan, dedi u 22 iyul, payshanba kuni kechqurun ZDF telekanali efirida.

«Biz shuni tan olishimiz kerakki, Putin bu gaz dastagini bizga qarshi ishlatadi», - deya ta’kidladi u. Shuning uchun Germaniya, Habekning fikricha, gazdan tejamkorlik bilan foydalanishi va muqobil variantlarni izlashda davom etishi kerak. 

Shu bilan birga, nemis vaziri Moskvaning «Shimoliy oqim» uchun turbinaga oid tushuntirishlarini «o‘ylab topilgan bahona» va «amalga oshmagan o‘yin» deb atadi. «Gazprom»da yetarlicha turbinalar bor, dedi u. Habekning so‘zlariga ko‘ra, «Shimoliy oqim» texnik xizmat ko‘rsatishdan oldin ham 100 foiz ishlashi mumkin edi. 

Shu bilan birga, Germaniya vitse-kansleri AQSh sanksiyalari ostida bo‘lgan «Shimoliy oqim 2»ni foydalanishga topshirish g‘oyasiga keskin qarshi chiqdi. Uning ishonchi komilki, bu qadam hech narsani o‘zgartirmaydi va faqat Rossiya gaziga qaramlikni oshiradi, Putin esa Ukrainada boshlagan urush uchun sanksiyalarni buzish bo‘yicha maqsadiga erishadi. «Bu Germaniya va Yevropada oq bayroqni ko‘tarish degani. Hech qanday sharoitda bunday qilmasligimiz kerak», - deya ta’kidladi nemis siyosatchisi. 

Habek, shuningdek, energiya tashuvchilarga yuqori narxlar va inflatsiya, aholi, iqtisodiyot, fuqarolik jamiyati va siyosat o‘rtasidagi o‘zaro bog‘liqlikka qaramay Germaniyaning birdamligiga ishora qildi. «Putin bizning qanchalik kuchli ekanligimizni hali bilib oladi», — deya qo‘shimcha qildi u. 

Bir kun avval Rossiyaning «Gazprom» konserni turli xavotirlarga qaramay, «Shimoliy oqim» orqali gaz yetkazib berishni tikladi. Profilaktika ishlaridan so‘ng gaz quvuri orqali kuniga 67 million kubometr gaz yetkazib beriladi. Bu ta’mirlash boshlanishidan oldin yetkazib berish hajmga to‘g‘ri keladi, lekin loyiha quvvatining atigi 40 foiziga teng. 

Iyun oyida yetkazib berish hajmining kamayishi sodir bo‘lganidan so‘ng, Rossiya bu «Portovaya» kompressor stansiyasi uchun Siemens turbinasi qaytarilmayotgani bilan izohladi, uni Kanada hukumati dastlab Rossiyaga qarshi sanksiyalar tufayli ta’mirdan keyin qaytarishni rad etgandi. Biroq, nemis tomoni bilan muzokaralardan so‘ng, Ukraina rasmiylarining noroziligiga qaramay, u Germaniyaga yuborildi.