Qashqadaryoda veloyo‘lak va piyodalar yo‘lakchasi qurishi lozim bo‘lgan MChJ rahbari 1,1 milliard so‘mni o‘zlashtirib yuborgani aniqlandi

Bosh prokuratura huzuridagi departamentning xabar berishicha, departamentning Muborak tuman bo‘limi tomonidan tergovga qadar tekshiruv o‘tkazilgan.

Tekshiruvda, "N." MChJ rahbari va boshqalar tuman hududida velosiped va piyodalar yo‘lakchalarini qurish va ta’mirlash ishlari bo‘yicha rasmiy hujjatlarga soxta ma’lumotlar kiritish yo‘li bilan bajarilmagan ishlarni qo‘shib yozib, 1,1 mlrd so‘mni o‘zlashtirish va rastrata yo‘li bilan talon-toroj qilganliklari aniqlangan.

Qayd etilishicha, mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilib, tergov harakatlari o‘tkazilmoqda.