Toshkentda ayrim korxonalar oqova suv tarmoqlaridan uzildi

“Toshkent shahar suv ta’minoti” xabariga ko‘ra, inshootga yuqori ifloslangan, yoqimsiz va badbo‘y hidli oqova suv tashlashi ehtimoli bo‘lgan 30 ta korxona ro‘yxati shakllantirilgan. Ushbu korxonalar Sergeli, Yakkasaroy, Yashnobod, Mirobod, Mirzo Ulug‘bek va Yangihayot tumanlarida joylashgan. Ishchi guruh tomonidan yuqoridagi korxonalardan 26 ta korxonaning oqova suv tarmog‘i va lokal tozalash inshooti texnologik holati o‘rganildi.

O‘rganishlar davomida 4 ta ishlab chiqarish korxonasi oqova suvlar bo‘yicha belgilangan me’yorlarga mutlaqo amal qilmayotgani aniqlanib, “Kaya naturdarme” MChJ, “Zamon» MChJ, “Charm attor” MChJ, “Xayk Paper” MChJlar shahar oqova suv tarmoqlaridan uzildi.

Barcha o‘rnatilgan korxonalardan laboratoriya tahlillari uchun namunalar olingan. Me’yordan yuqori ifloslangan oqova suv uchun kompensatsiya to‘lovlari qo‘llanilmoqda. 

Kelgusida belgilangan texnologik me’yorlarga to‘liq amal qilish bo‘yicha korxonalar rahbarlari ogohlantirilgan.