11:04 / 12.09.2022
2384
Португалия россияликларга «олтин визалар» беришдан бош тортяпти

Украинада уруш бошланганидан бери Португалия Россия фуқароларининг сармоя учун «олтин визалар» сўраб юборган барча 10 та аризасини рад этди. 2021 йилда Лиссабон 65 нафар россиялик учун «олтин виза»ни тасдиқлаганди.

Фото: Shutterstock

Россиянинг Украинага бостириб кириши бошланганидан бери Португалия Россия фуқароларининг «олтин визалар» сўраб мурожаат қилган барча 10 та аризасини рад этди, деб ёзади Publico 11 сентябр, якшанба куни Португалия Чет элликлар масаласи ва чегара қўриқлаш хизмати (SEF)га таяниб.

Уруш бошланганидан кейин расмий Лиссабон Европа иттифоқининг Россияга қарши санкциялари муносабати билан Россия фуқароларининг «олтин визалар» олиш учун аризаларини кўриб чиқишни тўхтатди. Тўхтатилганидан бери Португалия ҳукумати 10 та аризани қабул қилиб, уларнинг барчасини рад этди. 

2012 йилдан бери фаолият юритаётган дастур 250 минг евро миқдоридаги сармоя эвазига Португалияда яшаш учун рухсатнома олиш имконини беради. Дастур бошлангандан бери Россия фуқароларига 430 дан ортиқ «олтин визалар» берилди, дея таъкидлайди Publico. 

SEF маълумотларига кўра, Португалия охирги марта Россия фуқароларига «олтин визалар»ни 2022 йил январида берган. Ўшанда 7 та ариза маъқулланди. 2021 йил декабрида 10 та, ноябрда бешта, октябрда саккизта виза берилган. Ҳужжатни 2021 йилда жами 65 нафар россиялик олган. 

Top