Portugaliya rossiyaliklarga «oltin vizalar» berishdan bosh tortyapti

Rossiyaning Ukrainaga bostirib kirishi boshlanganidan beri Portugaliya Rossiya fuqarolarining «oltin vizalar» so‘rab murojaat qilgan barcha 10 ta arizasini rad etdi, deb yozadi Publico 11 sentabr, yakshanba kuni Portugaliya Chet elliklar masalasi va chegara qo‘riqlash xizmati (SEF)ga tayanib.

Urush boshlanganidan keyin rasmiy Lissabon Yevropa ittifoqining Rossiyaga qarshi sanksiyalari munosabati bilan Rossiya fuqarolarining «oltin vizalar» olish uchun arizalarini ko‘rib chiqishni to‘xtatdi. To‘xtatilganidan beri Portugaliya hukumati 10 ta arizani qabul qilib, ularning barchasini rad etdi. 

2012 yildan beri faoliyat yuritayotgan dastur 250 ming yevro miqdoridagi sarmoya evaziga Portugaliyada yashash uchun ruxsatnoma olish imkonini beradi. Dastur boshlangandan beri Rossiya fuqarolariga 430 dan ortiq «oltin vizalar» berildi, deya ta’kidlaydi Publico. 

SEF ma’lumotlariga ko‘ra, Portugaliya oxirgi marta Rossiya fuqarolariga «oltin vizalar»ni 2022 yil yanvarida bergan. O‘shanda 7 ta ariza ma’qullandi. 2021 yil dekabrida 10 ta, noyabrda beshta, oktyabrda sakkizta viza berilgan. Hujjatni 2021 yilda jami 65 nafar rossiyalik olgan.