Siyosatshunosga ko‘ra, Putinning Ukrainaga tegishli va o‘zini o‘zi mustaqil deya e’lon qilgan Qrim, Xerson, Zaporijjya, Donetsk va Luhansk oblastlarini Rossiya tarkibiga qo‘shib olishdan ko‘zlagan qator maqsadlari bor.
“Bilasiz, Vladimir Putin va Rossiya Federatsiyasi o‘zga davlat yerlarini birinchi bor annexia qilayotgani yo‘q. 2014 yilda ham Ukrainaga tegishli bo‘lgan Qrim avtonom respublikasi avval referendum o‘tkazish va keyin go‘yoki Qrim murojaati orqali Rossiyaga qo‘shib olingan edi.
O‘shanda Rossiya jamiyatida “Qrim eyforiyasi”, ya’ni Qrim Rossiyaga qaytdi, degan fikr bo‘lgandi. Bu esa Rossiyada Putin hokimiyatini mustahkamlashga katta hissa qo‘shdi. Lekin bugun vaziyat o‘zgacha. Bugun Ukrainaga tegishli viloyatlarning mustaqillik e’lon qilishi va Rossiya tarkibiga kirishi jahon hamjamiyati tomonidan juda yomon qabul qilindi, shuningdek, Rossiyaning ichki ahvoli uchun ham bu hech qanday rol o‘ynamay qo‘ydi.
Bu yerda Putin ko‘zlagan yana bir qator nuqtalar bor. Unga ko‘ra, bu viloyatlar endilikda Rossiya tarkibida bo‘lgani uchun Putin kuzgi chaqiriqda harbiy xizmatda bo‘ladigan yoshlarni o‘sha hududlarga xizmatga yuborishi mumkin.
Bu mobilizatsiyaga qo‘shimcha ravishda yana 150 ming qo‘shimcha kuch degani. Bundan tashqari, o‘sha hududlarning aholisi ham endilikda frontga jalb qilinishi mumkin. Bunga Rossiya nuqtayi nazaridan qonuniy asos bor.
Uchinchidan, hozir menga Rossiyaning yadro qurollarini joylashtirish bo‘yicha texnik ishlari ma’lum emas, lekin u Qrimda joylashgan taktik yadro qurollariga o‘xshash qurollarini yangi hududlarda ham joylashtirishi va bu orqali Ukrainani qo‘rqitishi mumkin.
To‘rtinchidan, Rossiya va Putin uchun hozir ahamiyatlisi bu viloyatlar Rossiya tarkibida bo‘lar ekan, endi bu urushni dunyo tanqid qilayotgani kabi bosqinchilik urushi emas, vatan uchun urushga aylantirmoqchi.
Beshinchidan, Rossiya tarkibiga qo‘shilgan yangi hududlarga tajovuz bo‘lsa, bu Rossiya hududiga tajovuz sifatida baholanadi va Putin uchun yadroviy konsepsiyaga asosan “dushmanga” qarshi taktik yadro qurollaridan zarba berish imkoniyati tug‘ilishi mumkin”, – dedi Xurshid Habib.
U shuningdek, Rossiyaning ko‘p yillar davomida harbiy qudrati va qurollari kuchi bo‘yicha gapirib kelingan tahdidlari bugun puchga aylangani hamda hozir hech kim Rossiyadan qo‘rqmay qo‘ygani haqida ham gapirdi.
“Bugun Rossiyaning harbiy qudrati va qilayotgan harakatlaridan hech kim cho‘chimay qo‘ydi. Buni ochiq aytish kerak. Chunki Rossiyaning harbiy qudrati fevral oyida dunyo qo‘rqqani, kutgani kabi qudratli bo‘lib chiqmadi.
