SpaceX samolyotlar uchun sun’iy yo‘ldosh internetini taqdim etdi

Ilon Maskning SpaceX kompaniyasi samolyot yo‘lovchilari uchun yuqori tezlikdagi Starlink Aviation sun’iy yo‘ldosh internet xizmatini ishga tushirganini ma’lum qildi.

Foto: Reuters

Loyiha veb-saytida aytilishicha, avialaynerlardagi ulanish tezligi sekundiga 350 megabitga yetadi, bu esa barcha yo‘lovchilarga bir vaqtning o‘zida internetdan bemalol foydalanish imkonini beradi.

«Atigi 20 millisekundlik kechikish bilan yo‘lovchilar ilgari parvoz paytida imkonsiz bo‘lgan harakatlarni, jumladan videoqo‘ng‘iroqlar, onlayn o‘yinlar, virtual xususiy tarmoqlar va yuqori tezlikda ma’lumot uzatish bilan bog‘liq bo‘lgan boshqa harakatlarni amalga oshirishi mumkin», — deyiladi bayonotda.

Kompaniya 2023 yildan boshlab, ba’zi samolyotlarda butun parvoz davomida yuqori tezlikdagi internetni taklif etishni rejalashtirmoqda.

Aviakompaniyalar dasturga ulanish uchun samolyot bortida 150 ming dollarlik maxsus jihozni o‘rnatishi kerak bo‘ladi. Abonent to‘lovi oyiga 12,5 ming dollardan 25 ming dollargacha. Uskunalar to‘plamiga SpaceX veb-sayti orqali 5 ming dollarga oldindan buyurtma berish mumkin. Ularni yetkazib berish 2023 yilda boshlanadi.

#Ilon Mask #SpaceX #yuqori tezlikdagi internet