Vengriya O‘zbekistonda yirik parrandachilik klasteri tashkil etadi

Uchrashuv chog‘ida Toshkent viloyatining Ohangaron tumanida qo‘shma parrandachilik klasterini tashkil etish masalalari muhokama qilindi. Bu masala Vengriyaga amalga oshirilgan oliy darajadagi tashrif arafasida O‘zbekiston qishloq xo‘jaligi vaziri Aziz Voitov bilan muhokama qilingani va o‘zbek tomonidan Ohangaron tumanida parrandachilik klasterini tashkil etish loyihasi ilgari surilgani qayd etildi.

Bonafarm Group kompaniyasi bosh ijrochi direktori mazkur loyihaga qiziqish bildirgan holda uni amalga oshirish imkoniyatlarini batafsil o‘rganish uchun yaqin kunlarda kompaniya ishchi guruhi O‘zbekistonga amaliy safari bilan borishini ma’lum qildi.

Bonafarm Group 2009 yilda tashkil etilgan bo‘lib, qishloq xo‘jaligi va oziq-ovqat mahsulotlari, chorvachilik, yem-xashak yetishtirish, go‘sht-sut mahsulotlari ishlab chiqarish bilan shug‘ullanadigan yetakchi korxonalarni birlashtirgan. Kompaniya aktivlari miqdori 1,9 mlrd dollar, tovar aylanmasi 805 million dollarni tashkil etadi.