Vengriya parlamenti bosh vazir lavozimida bo‘lish muddatini chekladi

15 iyun kuni bo‘lib o‘tgan ovoz berish jarayonida konstitutsiyaga kiritilayotgan o‘zgarishlarni 134 nafar deputat qo‘llab-quvvatladi. 50 nafar deputat qarshi ovoz bergan bo‘lsa, yana olti nafar parlamentariy betaraf qoldi.

Yangi qoidaga ko‘ra, bosh vazir lavozimida ishlash muddati eng ko‘pi bilan ikki to‘rt yillik davr bilan cheklanadi. Muhimi, mazkur norma faqat kelajakdagi rahbarlarga emas, balki 1990 yildan buyon Vengriya bosh vaziri bo‘lib ishlagan barcha shaxslarga nisbatan ham tatbiq etiladi.

Bu esa mamlakat siyosiy hayotida muhim o‘rin tutgan Viktor Orbanning yana hukumat rahbari sifatida qaytish ehtimolini istisno qiladi. Orban turli yillarda jami besh muddat davomida Vengriya bosh vaziri lavozimida faoliyat yuritgan.

Mazkur konstitutsiyaviy o‘zgarishlar amaldagi bosh vazir Peter Madyarning asosiy saylovoldi va’dalaridan biri edi. Uning ta’kidlashicha, hokimiyatning uzoq vaqt bir shaxs qo‘lida to‘planib qolishi demokratiya tamoyillariga salbiy ta’sir ko‘rsatishi mumkin. Shu bois bosh vazirlik muddatini cheklash davlat boshqaruvida muvozanat va raqobatni ta’minlashga xizmat qiladi.

Konstitutsiyaviy tuzatishlarni parlamentda Madyar rahbarlik qilayotgan «Tisa» partiyasi deputatlari qo‘llab-quvvatladi. Aksincha, Viktor Orbanning «Fides» partiyasi vakillari ushbu tashabbusga qarshi ovoz berdi.

Kuzatuvchilarga ko‘ra, mazkur qaror Vengriya siyosiy tizimida muhim burilish nuqtasi bo‘lib, mamlakatda hokimiyat almashinuvi mexanizmlarini mustahkamlashga qaratilgan qadam sifatida baholanmoqda.