AQSh Rossiya va Xitoyni BMTda Shimoliy Koreyani himoya qilishda aybladi

AQShning BMTdagi doimiy vakili Linda Tomas-Grinfild 4 noyabr, juma kuni Rossiya va Xitoy Shimoliy Koreyani Yapon dengizida raketa uchirishi ko‘paygani uchun joriy etilishi mumkin bo‘lgan sanksiyalardan himoya qilayotganini bildirdi. Uning so‘zlariga ko‘ra, BMT Xavfsizlik kengashi yig‘ilishlarida Rossiya va Xitoy KXDRning militaristik harakatlarini doimo oqlab keladi, shu orqali Shimoliy Koreya rejimini BMTning jazo choralaridan himoya qiladi va oxir-oqibat uning jazosiz qolishiga imkon beradi.

Bunday homiylik uchun Moskva va Pekin javobgarlikka tortilishi kerak, deydi Tomas-Grinfild. «BMT Xavfsizlik kengashi oldida javobgarlikdan qochib qutula olmaysiz, chunki KXDR Ukrainaga harbiy bostirib kirganingiz uchun sizga qurol sotish imkoniyatiga ega», - deya iqtibos keltirgan Reuters amerikalik elchining Moskvaning BMTdagi vakillariga aytgan so‘zlaridan.

Sentabr oyi oxirida KXDR mintaqada qisqa va o‘rta masofaga uchuvchi raketalarni tizimli ravishda sinovdan o‘tkazishni boshladi – bir necha kun ichida u kamida to‘rtta shunday parvozni amalga oshirdi. Oktabr oyida Pxenyan militaristik harakatlarini davom ettirdi - bir oy davomida Yapon dengizida Shimoliy Koreyaning kamida beshta raketa uchirilishi tasdiqlandi.

Sinovlardan birida Shimoliy Koreya tomonidan uchirilgan raketa besh yil ichida ilk bor Yaponiya arxipelagiga uchib o‘tdi, bu Yaponiya, Janubiy Koreya va boshqa davlatlarning noroziligiga sabab bo‘ldi. Shimoliy Koreya parvozlarni to‘xtatmasdan, AQShni BMT Xavfsizlik kengashiga ushbu masala bo‘yicha murojaat qilganini qoraladi. Pxenyan o‘z sinovini mintaqadagi keskinlikni kuchaytirayotgan AQSh va Janubiy Koreya qo‘shma mashg‘ulotlariga «qarshi chora» deb bilishini aytdi.

Rossiya va Xitoy BMT Xavfsizlik kengashining doimiy a’zolari sifatida uning rezolyutsiyalariga veto qo‘yish huquqiga ega va bundan Shimoliy Koreyaga nisbatan qattiqroq sanksiyalarni to‘sish uchun bir necha bor foydalangan.

The New York Times gazetasining AQSh razvedka ma’lumotlariga tayanib yozishicha, Moskva KXDR bilan do‘stona munosabatlarni mustahkamlashdan bevosita manfaatdor, chunki u Ukrainaga qarshi urushda foydalanish uchun qisqa masofaga uchuvchi raketalar va artilleriya snaryadlarini sotib olyapti. Yozda Rossiya prezidenti Vladimir Putin Shimoliy Koreya yetakchisi Kim Chen Inga yo‘llagan maktubida mamlakatlar o‘rtasida «har tomonlama va konstruktiv» munosabatlarni rivojlantirishga va’da bergan edi.

O‘z navbatida, Pekin Kremlga nisbatan eksport cheklovlariga rioya qilgan holda, urushning tugashini tezlashtirishi mumkin bo‘lgan Moskvaga ta’sirini muhokama qilishdan uzoqlashishga harakat qilmoqda. Bu mavzu, jumladan, 4 noyabr kuni Germaniya kansleri Olaf Sholsning Xitoyga tashrifi chog‘ida Xitoy rahbari Si Jinping bilan suhbatida ko‘tarildi.